ATV-t pillugit inatsit malinneqanngitsoq
Nunakkoorutit ATV-it takornarianut angallaviusartuni atorneqaqqusaangillat. Tamanna ukiut marluk matuma siorna KNR-imi oqaluttuarineqarpoq. Inatsisilli suli unioqqutinneqartarput.
AAMMA ATUARUK Turister skuffes af ATV’er
- Killeqanngitsumik atugaaneri takusarlugit assut pakatsinartarpoq, ukiorpaaluimmi aqqutikut ersittaramik, Kangerlussuarmi takornarianik angallasisartoq Adam Lyberth taama oqarpoq.
Takornariat umimmannik takunissamminnik soqutiginittorujussuusarput.
- Soorunalimi umimannik takunngitsooraangamik pakatsisarput, tassami ingerlaarnerminni nunakkoorutit aqqutigisimasaat nutaat takuneqarsinaasarammik, Kangerlussuarmi takornariartitsisartoq Jens Pavia Brandt taama oqarpoq.
Ajornartorsiut ukiuni arlaqartuni ajornartorsiutigineqarpoq, inatsisitigullu sukaterisoqarnissamut pisortat iliuuseqaanngillat inatsisillu atuuttut malinneqarnissaannut iliuuseqartoqarani.
Takornariartsisartut isumaqarput, inatsisit qasungavaallaartut.
- Ullumikkut qanorluunniit iliorsinnaavutit unioqqutitsisioqaannilu paasineqarsinnaanissaq ilimanaateqartarani, paasisaagaannilu 500 kr-nik akiliisitsisoqartarpoq tamannalu soqutigineqarpallaarunanngilaq, Jens Pavia Brandt oqarpoq.
Taanna isumaqarpoq Kangerlussuarmi nunakkoorutit ATV-it tamarmik sumiissusersiutinik GPS-imi atortulerneqartariaqartut, taamaaliornikkut ulloq unnuarlu sumiissimanerat takuneqarsinnaaniassammata.
Takornarianik angallassisartoq alla Adam Lyberth ukiuni amerlasuuni takornarianik sullissisimasoq isumaqarpoq, piniarnermut nakkutilliisup ataatsip kangerlussuarmilu politiit marluk Kangerlussuarmi nunarujussuaq nakkutigisinnaanngikkat.
Kangerlussuaq eqqaalu naalagaffiit peqatigiinnit UNCESCOmit eriagisassanngortinneqarpat nunarsuarmi allani eriagisassanngortinneqartut assigalugit nakkutiliisoqalernisaa Kangerlusssuarmi takornarianik angallassisartup Adam Lyberthip takorloorpaa.
AAMMA ATUARUK Kangerlussuarmi umimmanniarnermut atatillugu ATV-nik unioqqutitsilluni atuineq
