Atuisut siunnersuisooqatigiivi Kullorsuaq pillugu: Akueriuminaappoq

Radioaviisimi ippassaq saqqummiunneqarpoq Pilersuisup Kullorsuarmi pisiniarfia nerisassanik ulluni makkunani pisiassaateqanngitsoq. Tamatumalu kinguneranik nunaqarfimmiut puisit neqaanik aamma qaleralinnik nerisaqarnerulersimasut. Meeqqat nerisimanatik taquaratillu atuariartortariaqartarput.

Atuisartut Siunnersuisoqatigiivisa siulittaasuata, Rigmor Th. Høeghip akueriuminaatsippaa Pilersuisup Kullorsuarmi nerisassanik pisiassaataarunnera.

- Assut akueriuminaappoq taamatut atuisut pisiniartartut Kullorsuarmi pisiassaarussimappata.

- Pisiniarfiit taamatut pisiassanik imaarunneranik arlaatigut tulleriissaarineq misissoqqissaarneqartariaqarpoq. Peqquteqarsimassooq, Rigmor Th. Høegh oqarpoq.

Siumup siulittaasua Aleqa Hammond Naalakkersuisunut paragraf 37 aqqutigalugu ippassaq apeqquteqaateqarpoq Naalakkersuisut suligasuarniarnersut:

- Meeqqalluunniit taquassaarutivissortut, inuit inuussutissaarutivissortumut, killittoqarsimassappat isumaqarama Naalakkersuisut suligasuartariaqartut innuttaasut atugaat taama ajorluinnartigisut suliniuteqarfigalugit, Aleqa Hammond Naalakkersuisunut § 37-mut apeqquteqaateqarnerminut taama tunngavilersuivoq.

Ineqarnermut, Attaveqarnermut Angallannermullu Naalakkersuisoq, Jens B. Frederiksen, Pilersuisup nunaqarfinnut pilersuisussaatitaaneranut politikkikkut akisussaasuusoq oqaaseqartinniaraluaratsigu, pisoq pillugu oqaaseqarumanngilaq, akerlianilli Pilersuisumut innersuussilluni.

Kullorsuarmilu atuisartut tallimanngorneq juunip qulingat umiarsuarmit anguneqarsinnaanissaminnut neriuinnartariaqassapput. Tassami umiarsuup siulliup tikinnissaa juunip qulingani pisussatut pilersaarutigineqartoq Pilersuisumit ilisimatitsissutigineqarnikuummat. Taamaattumillu timmisartukkut allatigulluunniit nioqqutissanik apuussinissaq pilersaarutigineqanngitsoq.