Atuisut sanaartornermut akiliuteqarnerussapput

Inatsisartuni ilaasortat 31-t upernaami ataatsimiillutik nalunaaqutaq ataatsimut aallartissapput.

Naalakkersuisut siunissami nunatta ingerlanneqarnissaanik anguniagaat Josef Motzfeldtimit saqqummiunneqartut ilaasa tusarnaassavaat. Siunissamilu sanaartornissaq anguniarneqarpoq. Umiarsualiviliortoqarnissaa, erngup nukinganik atuilluni nukissiuutinik sanaartortoqarnissaa, mittarfiliornissarlu angorusunneqarpoq. Suliffeqarfiit innuttaasullu taakkunannga atuisussat akilersuisuunerpaajunissaat naalakkersuisunit siunnersuutigineqarpoq. Assersuutigalugu timmisartorniaruit mittarfeqarfinnut akileraarut aqqutigalugu akileeqataasarnissat siunnersuutaavoq.

Nunatsinni sanaartortoqangaatsiarniarpoq, aningaasallu akiliutissat pillugit Josef Motzfeldt ima oqarpoq:

- Akileraarutit qaffasinnaavagut taarsigasarsiniarsinnaavugulluunniit. Tamannali akisunaartussaassavarput. Taarsigasarsiniarniaruttami 3-4 milliard koruunit missaani akilertariaqassavagut. Aningaasalersuiniarluni periarfissat tamaasa tusarusuppagut, taamaattumik partiit qanoq isumaqarnersut tusarniaaviginiarpagut, Josef Motzfeldt oqarpoq.