Atuisut Pisiffiup nipitittakkanik ussaasaarutaat pillugit maalaaruteqarput

Atuisut nipitittakkat katersatik atorlugit iganik, siatsivinnik assigisaannillu taarserniaraluarlutik savinnik naasunillu aserorterivinnik taamaallaat taarsiinissamut periarfissaqartarput. Tamannalu nunatsinni pisinniarfiit annersaani neqeroorutinik nunguutisimanermik tunngaveqarpoq.

-Pisisartunik arlaqartunik naammagittaalliorfigineqarpugut. Pisiffimmilu nipitsittakkanik neqerooruteqarnermi pisinniarfimmit allanneqarsimavoq pisiassat neqeroorutaasut toqqorsivinni pigineqartut nungunnissaata tungaanut atuutissasut. Maannalu misissorparput nuna tamakkerlugu neqeroorutigineqartut naammattut toqqorsivinni pigineqarsimanersut, atuisut maalaaruteqartarfianni ataatsimiititaliami siulittaasoq Jannik Isidor knr.gl-imut oqaluttuarpoq.

Pisiffimmi atuisut taama misigisaqarnerat pisiffimmit tulluusimaarutigineqanngilaq. Pisormi utoqqatsinartutut ajuusaarnartutullu isigaat.

- Isumaqarsimarsimanngikkaluarpugut nipitsittakkanik agguaaneq ima soqutigineqartigissasoq allaat neqeroorutit nungunnerannik kinguneqartumik. Nassuerutigisariaqarparput kukkuneq uatsinniimmat. Neqeroorutinillu nunguutsinitsinni pisisartugut aaqqiniarluta neqerooruteqarfigeqqippagut. Taamaalillutillu pisiassat piniaraluakkamik nungussimasut pitsaaqataannik pissarsisinnaanissaminnut periarfissaqalerput, Pisiffimmi attaveqarniarnermi pisortaq Søren Olsen Damgaard taama oqarpoq, ilanngullugulu aamma oqaatigaa siunissami assingusumik aaqqissuussisoqaqqissappat ajornartorsiut maanna pisoq pinngitsoortsinniarneqarumaartoq.