Atuisut akiliisalernissaat eqqartorpaat
Ilulissani Kalaaliaqqami sulisut atorfeqartinneqarnerat januaarip naanerata tungaanut Qaasuitsup Kommuniata sivitsorallarpaa. Siunissaq pillugu kommuuni piniartullu maanna oqaloqatigiipput.
Aalisartut, piniartut Qaaasuitsullu Kommunia tallimanngorneq januaarip arfernata ataatsimeeqatgiiipput. Tamanna pivoq kommuuni aalajangereersoq Ilulissani Kalaaliaqqami sulisut marluusut suliunnaarsinneqassasut. Pilersaarutaagaluarpoq aalisartut piniartullu namminneq pisaminnik tuniniaasalernissaat. Ingerlatsinermut aningaasartuutit tamaasa kommuunip kisimiilluni matussusersinnaajunnaarpai.
- Ullumikkutut ingerlaaseq suli periarfissatut matunneqanngilaq. Taamatulli ingerlaqqittoqassappat tuniniaasut ingerlatsinermut akileeqataasarnissaat ataatsimiinnermi peqataasut tamatta isumaqatigiissutigaarput, Sanaartornermut, Avatangiisinut, Attaveqarnermut Atortulersuutinullu ataatsimiititaliap siulittaasua Bent B. Kristiansen nalunaarpoq.
Taassuma ilanngullugu erseqqissaatigaa ullumikkutut aalisartut piniartullu pisaannik sulisut marluusut tuniniaasuunerat ingerlaannarallassasoq siunissaq pillugu isumaqatigiittoqarnissaata tungaanut.
