Atuisunut paasissutissiisarnini pitsanngorsarpaa

Air Greenlandimi ilaasussat timmisartuussinissanik allanngortoqartillugu toqqaannartumik e-malikkut attavigineqartalissapput.
januaarip 12-at 2011 08:58

E-malikkut attaveqaat ilaasunik angallassinermi allanngortoqartillugu atorneqartassaaq, massakkorpiarlu Air Greenlandip timmisartortartullu aaqqiagiinngissuteqarnerisa nalaanni angalasussanut attaveqaatitut atorneqalereerluni.

- Ilaasussat pineqartut allanngortoqarneranik e-mailikkut nalunaarutisisassapput. Pisumilu matumani ilaasussaq timmisartuussinissap ilaaffigissasaagaluup taamaatinneranik nalunaarfigineqassaaq, ilanngullugulu atuisoq arlalinnik periarfissaqarneranik paasitinneqassaaq. Tassa bilitsimik utertitsineq, ullormut allamut aallarfissamut nuussineq aamma bilitsi pigiinnarlugu tulliani aallarfissamut siullermut inissalimmut utaqqineq, Air Greenlandimit taamatut paasissutissiisoqarpoq.

Air Greenlandillu taamaasilluni piaartumik paasisinnaassavaa ilaasut sorliit paasissutissamik tigusaqareersimasut, kikkullu suli paasitinneqanngitsut taamaattumillu sianerfigalugit attavigineqassasut.

- Alloriarneq tullinnguuttoq tassaavoq sms-ikkut nalunaartalernissaq, taamaasilluta atuisut paasissutissanik mobiiliinut kalerrissinnaalissagatsigit, E-sales manager Jesper M. Drejer oqarpoq.