Atuisunut akigititat qaffariarput
Atuisunut akigititat januaarip ulluisa aallaqqaataanniit 2006-imiit januaarip ulluisa aallaqqaataannut 2007-imut 2,3 procentimik qaffariarput. Tassa 2005-imi qaffariaataasoq naligalugu.
”Januaarip ulluisa aallaqqaataani 2007 akit nalingi”-ni, Kalaallit Nunaanni Naatsorsueqqissaartarfiup kisitsisini ullaaq manna saqqummiuteqqammigaani, tamanna erserpoq.
Ineqarnermut akiliutip ineriartornera aningaasap nalingata appariartorneranut ilapittuutaangaatsiarpoq. Ineqarnermut akiliutit agguaqatigiissillugit 5 procentimik qaffariarput. Ataatsimit aallararfimmit kiassarneq, aamma kiassaateqarfinniit ataatsimoorussamik kiassarnerit, taamatuttaaq 10 procentimik qaffariarfiullutik.
Oqarasuaateqarnikkut, nassiussat ilaalu ilanngullugit akii akit apparnerannut ilanngullutik peqataapput. Oqarasuaateqarnermut akiusut apparnerannik tamanna siullermik pissuteqarpoq. Atisat akimikkut taamatuttaaq appariarput.
Nukissiuuteqarnikkut akit juuli 2006-iugaali 1 procentingajammik qaffapput. Nukissiuutitigut tunisaq piffimmi qaangiuttumi annertuumik millivoq.
Akitigut qaffariarnerit annertuut Kalaallit Nunaanni pissutsinut naleqqiullutik Islandimi pingasoriaammik 2006-imi qaffariarsimapput – Savalimmiunili qaffariaat nunatsinni qaffariaammit affaannaasimalluni. Danmarkimi, Sverigimi Nunavumilu qaffariaatit nunatsinni qaffariaatinut assingusut, nalunaarsukkami takuneqarsinnaavoq.
