Atuisartut siunnersortaat angalaalerput

januaarip 15-at 2007 12:35

Unammilleqatigiinnermi Atuisartunullu Siunnersuisoqatigiit Allaffeqarfiata siunnersortaa Nanortalimmut, Qaqortumut Narsamullu sapaatip akunnerata uuma ingerlanerani angalaalerpoq.

Siunertaavoq kommunini Atuisartut Sinniisaanni ilaasortanik pisiniarfinni akinik misissueriaatsinik Inatsisillu imaannik pikkorissartitsinissaq, taama oqarpoq Allaffeqarfimmi siunnersortitut atorfilik Steffen Lynge.

-Avannaani oqallisaanerusarpoq ukiuunerani sikuunerata nalaani naatitat silaannakkut assartorneqarnertik pissutigalugu akisunerujussui anniarineqartarpoq. Kisianni aamma assartorneqarnerini akii qaffasinnerujussuat paasinartinneqartarpoq, Steffen Lynge nassuiaavoq.

Akinik misissuinermi tunngavissat, pisiassat ullulerneqartarneri, atuisartut ilaasortaasa suut suliarisinnaaneraat, assersuutigalugu bibliotikkit nakorsiartarfiillu ammasarfii naammaginartuunersut pisiniarfiillu isaaariaat ajunngitsumik inissisimanersut oqallisissianngorlugit pikkorissartitsinermi saqqummiunneqassapputtaaq.

Maniitsumi, Sisimiuni, Upernavimmi, Aasianni Qeqertarsuarmilu Atuisartut Sinniisaanni ilaasortat februarimi Kangerlussuarmi pikkorissartinneqassapput.