Atuisartut ataatsimiititaliaat avannaani amigaatigineqarpoq

Atuisartut siunnersuisoqatigiiffianni ilaasortaq Pele Jensen, Ilulissani najugaqartoq, Qaasuitsup Kommuniani innuttaasunit saaffigineqartarpoq.

- Iffiaq qaqortoq igalaaminernik akulik Ilulissani iffiorfimmi tunineqarsimasoq ippassaq nerineqarpoq. Pisoq ulorianarpoq atuisartut siunnersuisoqatigiiffianni siulittaasoq tullia Pele Jensen oqarpoq.

Ilulissani iffiorfik iffiamik qaqortumik igalaaminertalimmik tunisaqarsimanera pillugu, Pele Jensen ippassaq sapaammi saaffigineqarpoq.

- Suliaq ilungersunarmat Atuisartut siunnersuisoqatigiiffiannut suliassanngorlugu ingerlateqqinneqarpoq. Iffiaq qaqortoq igalaaminertalik uumasut nakorsaannit missisorneqarpoq, pisorlu ilungersunartutut isigineqarpoq, Pele Jensen oqarpoq.

- Qaasuitsup kommuneani atuisartut pisisartullu ataatsimiititaliaannik pilersitsoqarsimannginnera innuttaasunit utaqqikatanneqarpoq. Atuisartut pisisartullu assigiinngitsunik ajornartorsiuteqarlutik saaffiginnittarput, taakkua nalunarisarpaat ajornartorsiutigisatik pillugit sumut saaffiginnissanerlutik, Pele Jensen oqarpoq.

- Qaasuitsup Kommunea atuisartut pisisartullu ataatsimiititaliaannik pilersitsinissaq pillugu arlaleriarlugu saaffigineqartarpoq, mannalu tikillugu suli pilersitsisoqanngilaq, Pele Jensen oqarpoq.

Qaasuitsup Kommunia, kommunit kattunnerisa kingorna kisiartaalluni atuisartut pisisartullu ataatsimititaliaannik pilersitsisimanngilaq. Qaasuitsup Kommunia oqaaseqartinniarsimagaluarparput tamannali aatsaat ualimut oqaaseqarfigisinnaallugu nalunaaruteqartoqarluni.