- Uanga isumaqarpunga, akitsoqqittariaqanngikkaat. Naammaqaat akii. Akisoreerpallaarami, Sofia Abelsen oqarpoq.Assi: KNR

Atuisartut angalaneq akitsoqqittussanngormat: Akisoreertigisoq

Air Greenlandimut ilaalluni angalanerup akisoreertoq Mittarfeqarfiit akitsuutinik qaffaaneratigut akitsoqqittussanngornera, atuisartut akuerisinnaangilaat. Taakkuami angalanerup akikinnerulernissaa kissaatigigaluarpaat.

- Tupannarpoq, tupannartorujussuuvoq. Soorlu imaannarluni, siunissami avannamukaqqissanerpungami.

 

Maniitsumi najugaqartoq, Naja Kristensen oqarpoq.

Taassuma ilaquttani ilagalugit Upernavimmiit Maniitsumut nuussimapput. Illoqarfigisimasaminnut tikeraarniarlutik billetsisissallutik misissuisimagaluarput.

Angalanerli akisummmat Maniitsumiit Upernavimmukarsinnaajunnaarsimapput.

Inersimasut marluk meeqqallu marluk Maniitsumiit Upernavimmut siumut utimullumi angalanissaat 31.900 koruuninit ullummikkut akeqareerpoq, akitsoqqittussanngorlunilu.

- Ullumikkut angallanneq akisoreertigisoq suli qaavatigut akitsoqattaarpoq. Akikillisinnaappat ilimagaara Upernavimmukassasunga. Kisianni akitsortaqattaaginnarniarpat ilimananngilaq, Naja Kristensen oqarpoq.

Allaammi ataataniluunniit toqummat ilisiartoqataasinnaasimanngilaq.

- Ataataga siornaak tassanngaanarluni toqummat, ilisiartortunut ilaasussaagaluarama, kisianni akisunermik uniinnarnikuuvunga ajoraluartumik. Sulilu ilerfiarnanga.

Akisuallaarpoq

Sofia Abelsen Savalimmiuniit København Narsarsuarlu aqqusaarlugit Qaqortumi feeriareerluni Savalimmiunukaqqilerpoq. Taasumalu Naja Kristensen isumaqatigilluinnarpaa.

- Uanga isumaqarpunga, akitsoqqittariaqanngikkaat. Naammaqaat akii. Akisoreerpallaarami, Sofia Abelsen oqarpoq. 

- Københavnimiit maanga akisoorujussuuvoq, akisuallaarpoq, taanna nangippoq.

Taamaammat angalanerup akitsoqqinniarnera akuerisinnaanginnerarpaa.

- Tassa taamatut feeriarusukkaluarluni akisuallaarami. Ukiut marlukkaarlugit aatsaat immaqa feeriarsinnaapput inuit akissallit.

Nuummiit Københavnimut uterlugulu billetsi assersuutigeriarutsigu, taanna 145 koruuninik akisunerulissaaq.

 

Illoqarfinnili avinngarusimanerusuni akitsuutit amerlanerussapput, Upernavimmiit Paamiuniillu Københavnimut utimullu billetsi 365 koruuninik akisunerulissagami.

Timmisartumik ukiortaamiit angalaniaruit akisunerunissaa naatsorsuutigilereersinnaavat. Mittarfeqarfiimmi atuisunut akigititaminik qaffaammat, angalanissamut billitsit akii qaffanneqartariaqassasut Air Greenlandimit oqarput. Akitsuutinik qaffaaneq atuisunut 2020-mi 17 millionit koruuninik naleqassaaq. Atuisunillu tamanna matussuserneqartariaqartoq nutaarsiassaqartitsivik Sermitsiaq.ag allappoq.

Mittarfeqarfiit akitsuutinik qaffaanissartik juulip qaammataani nalunaarutigaat. 2013-imili akinik qaffaasimannginneq suliffeqarfiup aningaasaqarneranut 25 millionit koruuninik naleqarsimasoq, tassanngaanniit nalunaaruteqarnerminni ilaatigut eqqaavaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat