Atuisartunut siunnersuisut pikkorissartinneqartut

Nioqqutissat nutaanngippallaartut, nioqqutissat utertinneqarsinnaanngitsut, suliarititanut naammagittaalliornerit… Tamakkuupput atuisartut sinniisaasa isumasioqatigiinneranni pikkorissartinneqarnerannilu ippassaq ullumilu oqallisigisaat.

Kommunini atuisartunut pisisartunullu ataatsimiititaliat aallartitai illoqarfinnit 16-ineersuupput, katillutik 30-it missaanniillutik. Siunertarineqarpoq kommunini atuisartunut pisisartunullu ataatsimiititalianut nutaanut ilinniartitsissutigissallugu, atuisunut qanoq siunnersuisarsinnaanissaat.

Danmarkimi inatsit nutaaq atuisartut pisinnaatitaaffeqarnerulernerannik kinguneqartoq ukioq 2002-mi atuutilerpoq, nunatsinnili suli atuutitinneqalerani. Taanna, nunatsinnilu inatsisit atuutsinneqartut, ilisimaarineqarnerulernissaat pitsaanerusumillu siunnersuisinnaalernissaq anguniarneqarput.

Peqataasunik pikkorissaaneq ullaap-tungaani ingerlanneqariarluni, ualimut Danmarkimi atuisartut siunnersuisoqatigiivisa aallartitaat, inatsisinik ullutsinnut naleqqussakkanik peqarnissaata pingaassusianik oqalugiaateqassaaq. Kingorna avatangiisit pingaartinneqarnissaannik aamma nassuiaateqartoqassaaq ualikkullu naliliinnginnermi KNR Pilersuisoq A/S, sinerissap ilarujussuani pilersuisoq oqalugiartitsissalluni.