Atuisartunut siunnersuisoqatigiit: Sumiiffigisanni pisinnaatitaaffitit misissukkit
- Sumut angalaniarneq apeqqutaasorujussuuvoq. Assersuutigalugu unammilleqatigiiffiusumi angalaniaraanni kiffartuussinissamik isumaqatigiissuteqarfiusumut sanilliullugu pisinnaatitaaffiit assigiinneq ajorput. Taamaammat sumut angalaniarneq aallaavigalugu pisinnaatitaaffiit misissorneqarnissaannut pissutissaqarluarpoq, atuisartunut siunnersorti Malene Lynge oqarpoq.
Assersuutigalugu EU-mut angalaniaruit, taava inatsisit nunamiit nunamut assigiinngissuteqarsinnaapput.
Nunani avannarlerni pisiniarfissuit annersaanni Fieldsimi, Danmarkimiittumi, assersuutigalugu Italiamiut kamippaliaannik pisisimaguit, Nunatsinnullu utereerlutillu aatsaat paasillugu ajoquteqartut, taava tassunga atatillugu pisinnaatitaaffitit suunersut ilisimavigit?
Atuisartunut siunnersorti Malene Lynge ima siunnersuivoq:
- Pisiniarfimmut saaffiginneqqaarsimanngippata, tassa pisiniarfimmut pisiniarfigineqarsimasumut saaffiginneqqullugit innersuuttarpavut, taamaasilluni aaqqiisoqarsinnaammat, Malene Lynge oqarpoq, nangillunilu:
- Pisisoq imaassinnaavoq kamippannik Italiami pisisimasoq, taava Italiami inatsisit matumani atuutissapput, kisianni inatsisit nunani allani atuuttut tamakkerlugit ilisimanngilavut, kisianni misissorsinnaavavut. Atuisartut pisisartullu nalornissuteqaraangamik uagutsinnut saaffiginnissinnaapput, Malene Lynge oqarpoq.
Sulinngiffeqareerlutit angerlamut utileruit timmisartoq imaassinnaasoq inortorit. Taava pisinnaatitaaffiit suuppat?
Siunnersorti Malene Lynge ima oqarpoq:
- Bilitsisinermi piumasaqaatit suut atuunnersut apeqqutaavoq. Atuisartut pisisartullu inatsisitigut imatut illersorneqanngillat, timmisartortitseqatigiiffiummi ilaaffigineqartussap piumasaqaatai suunersut apeqqutaassammata. Imaassinnaavoq nutaamiik bilitsisisariaqassasoq, aamma imaassinnaavoq bilitsi allanngorteriaannaassasoq, atuisartunut siunnersorti Malene Lynge oqarpoq.
Angalanerup nalaani kinguaattoortoqarpat taamaatitsiinnartoqarpalluunniit pisinnaatitaaffiit suunersut allattorsimaffiat, Atuisartunut Siunnersuisoqatigiit nittartagaanni alakkarterneqarsinnaapput.
Siunnersuisoqatigiit nittartagaat tassaavoq www.atuisoq.gl