Atuisartunut Siunnersuisoqatigiit: Qulimiguullit atorluarniarsigik
Nanortalimmiit, Qaqortumut Narsarsuullu tungaanut helikopterimik angalaneq, akinik appaaffiusimammat, atorneruleqqullugu, siulittaasoq Nikolaj Ludvigsen inatsisartut angallannermut ataatsimiititaliaata siulittaasuanut Godmand Rasmussenimut allakkani ammasuni ilaatigut taama allappoq.
Atuisartunut Siunnersuisoqatigiit helikopterimik angalanissamik neqeroorut pitsaalluinnartutut isigaat, uggoraalli saqqumilaanngippallaarnera.
- Atuisut amerlanerpaat taamaattoqalersimanera ilisimanngilaalluunniit, Nikolaj Ludvigsen allappoq.
Allakkaminni inatsisartut naalakkersuisullu susassaqartut tamaasa aamma kajumissaarpaat, angallannikkut ajornartorsiut, maannamut nunatsinnut tamarmut sukumiisumik aaqqiivigineqarsimanngitsoq, iliuuseqarfigeqqullugu, sukumiisumik aaqqiivigineqanngippat nipangiunneqarnavianngitsoq unnerlugu.
-Nerioqaagut Inatsisartut ukiaru ataatsimiilerunik imaatigut angallanneq 2008-miit sukumiisumik eqqarsaatigilluakkamillu, tamarmik iluarisinnaasaannik utikuluffigineqartussaanngitsumillu aaqqiivigiumaaraat, kinguneralugu aaqqiinerit illuinnaasiortut ataavartumik naammagittaalliuutigineqartarnerat periarfissaqarlualernikkut peerumaartoq, Nikolaj Ludvigsen allappoq.
