Atuisartunut Siunnersuisoqatigiit ajornartorsiuteqarnertik nassuerutigaat
- Nittartakkatta nutarterneqanngilerneranut pissutaavoq sulisut taarserarsimanerat aamma nittartagalerisussaaleqineq. Maanimi Kalaallit Nunaanni tamakkulerisut ikittuinnaapput. Nittartagaq paasissutissanik nutaanik sivisuumik immersorsimanngilarput, tamanna systeminik nutarterinermik aamma pissuteqarpoq. Nittartakkap nutarternera periarfissaqaleriarutta nangissavarput, Atuisup allaffiani inatsisileritooq, Mark Larsen oqarpoq.
Mark Larsen aamma oqarpoq, atuisoq.gl ukiut arlallit matuma siornagut pilersinneqartoq paasissutissarpassuarnik suli aallerfigineqarsinnaasoq. Kikkulluunniit atuisartut allaffimminnut sianerlutik aamma ikioqqusinnaajuaannartut oqaatigaa.
- Inuit maanga Atuisumi allaffitsinnut sianersinnaajuaannarput, apeqqutaallu sapinngisamik akiniartarumaarpavut. Apeqqutaat ingerlaannaq akisinnaanngikkaangatsigik, saaffiginnissutaat misissoriarlugu kingusinnerusukkut akinissarput aamma neqeroorutigisarparput. Atuisunik kiffartuussinerput maanna taamaappoq, inatsisileritooq nassuiaavoq.
Atuagassiaq Atuisoq 2005-ip kingorna saqqummertarunnaarmat, nunatsinni atuisartut Danmarkimi Forbrugerrådip atuagassiaanik Tænk-imik qallunaatuinnaasumik pisisalernissaat Nunatsinni atuisartunut siunnersuisoqatigiit nittartakkaminni inassutigaat.
