Atugarliortut ilikkartikkuminaatsut
Naammagittarsinnaaneq atuartitsinerullu allanngorartittuarnissaa Danmarkimi kalaallit najugallit danskisut atuartinneqartut ilinniartinniarnerini pingaartuuvoq. Kalaallilli ilikkarsinnaassusiat allaaneqanngilaq, Danmarkimut nunasisut nunaminni sorsuttoqarnera eqqissiviilliortoqarneralu pillugu, pissusiat, taama oqarpoq oqaatsinik ilinniartitsisoq Else Lange.
-Kalaallit eqqaamasinnaassusiat kursuseqataannut naleqqiulluni killeqarneruvoq, ilaatigut aanngajaarniutinik atornerluisuusimanermik peqquteqarluni. Isumaliorulussinnaanngillat, tassa sivisungaatsiartumik sammisaq ataaseq tiguartiffigisinnaanngilaat.
Oqaatsit allanertat ilinniarniaraanni ilikkarsinnaassuseq eqqaamasinnaassuserlu pingaartorujussuupput, Else Lange erseqqissaavoq.
Else Lange oqaatsinik ilinniarfimmi Sprogcenter Vest-imi Vejen-imiittumi immikkoortortami pisortaavoq. Sulinerminullu atatillugu Esbjergimi kalaallit atugarliortut danskit oqaasiinik sapaatip-akunneranut marloriarluni ilinniartinneqarnissaat akisussaaffigalugu.
Suliniut taanna Esbjergimi kalaallit ornittagaat ”Oqqumut” suleqatigalugu ukiuni marlungajanni ingerlanneqarsimalerpoq.
Pikkorissartut eqqaamalluarsinnaanngitsut tunniusimasinnaanngitsullu atuartinniarlugit immikkorluinnaq ingerlaaseqartariaqartarlutik, Else Lange oqaatsinik ukiuni 20-ini atuartitsisarsimasoq oqarpoq.
- Uteqattaarisaqattaartarpugut sapinngisamillu atuartitsineq ataasiinnaatinnagu allanngorartittuartariaqartarlutigu.
Pikkorissartut ilaat takkuttuartanngimmata naammagittarnartorujussuunerarpaa, pikkorissartorlu paatsiveerusimaaleraangat ajunnginnerutittarpaat takkutinngiinnarpat, Else Lange naggasiivoq.