Henning Sloth Pedersen.

Atugarissaarnerup kingunipilui oqalugiaatigilerai

Avatangiisit inummut qanoq sunniuteqartarneri nakorsap Henning Sloth Pedersenip ukiut 30-t sinnerlugit ilisimatusarfigai.

Ilisimatusarnermini angusaata aammalu Issittumi mingutsitsineq pillugu Harvardip Universitetia suleqatigalugu ilisimatusarnermik suliniummi suliaata paasisaqarfiginissaanut sisamanngorpat periarfissaqassaaq.

Oqalugiarnera Teologisk Foreningimit aaqqissugaavoq taaguuteqarlunilu "Velfærdens Djævelskab", kalaallisuunngorlugu "Atugarissaarnerup Kingunipilui".

Inuiaqatigiit atugarissaarnerisa malitsigisaanik illut kiassagaalerput anartarfinnillu kuutsittakkanik pigisaqalerluta. Aammali iluaqutissatsinnik allanik atugaqalerpugut, soorlu fladskærmit, oqarasuaatit angallattakkat aamma sukkasuumik aaqqiissutissat allat atugarilerpagut, soorlu fast-food atortullu ataasiaannartakkat. Aamma plastikkimik annertuumik atuilerpugut.

Iluaqutissat tamakku atulernerisa ilutigisaanik akuutissat nutaat suliffissuarnermi atorneqalerput, taakkulu nunarsuup imavissuinut pisarput.

Akuutissat ilaat uumassusilinnut ilungersunartumik sunniuteqartuupput. Hormonitsinnut akornusersuutaapput, kræfteqalersitsisarput suiaassutsittalu celliini kromosominik aamma allanngortitsisarlutik.

Issittumi inuusut sunnigaanerupput, mingutsitsinermi inunniittoq nunarsuarmi annertunerpaatut uuttortarneqarsimavoq.

Atugarissaarnerup kingunipilui Issittumilu mingutsitsineq pillugit paasisaqarnerorusuttut Ilimmarfiup Auditoriaani sisamanngorpat oktobarip 15-iani nalunaaqutaq 19.30 tusarnaariarsinnaapput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl