Atuartuutillit Sisimiuni akerliussutsimik takutitsiniarput
Minngortuunnguup Atuarfiani siulersuisunut ilaasortaq Makkak Berthelsen ima oqarpoq:
- Qeqqata Kommunia taperserusukkatsigu akerliussutsimik takutitsiniarpugut, angajoqqaajusugut ilinniartitsisullu, meeqqat atugarisaat naammaginanngereeqisut akerliuffiginiarlugit akerliuniarpugut, Makkak Berthelsen oqarpoq.
Sutigummi aaqqisoqarnissaa takorloorassiuk?
- Pilersaarutit siornatigut takkuttareerput. Atuarfiup nutarterneqarnissaa ilaalu piiariarlugu nutaamik illutalersorneqarnissaa siunnersuutigineqarpoq. Pilersaarutinulli aningaasaliissutit amigartut Namminersornerullutik Oqartussaniit takkunnikuupput. Ilinniartitaanermut naalakkersuisup Tommy Marøp ukioq kingulleq tikeraareernerata kingorna Namminersornerullutik Oqartussani atorfilittat allagaqaannarnikuupput, suliniutigineqartussat allanngorujussuarlugit. Minngortuunnguup Atuarfiata ataannarnissaa uagut siunnersuutigaarput, Makkak Berthelsen oqarpoq.
Nalunnguarfiup Atuarfiani Minngortunnguullu Atuarfiani meeqqaminnik atuartuutillit Sisimiuni Katersortarfimmi ippassaani ataatsimiipput, akerliussutsimillu tallimanngorpat takutitsinissaq ullumimiit piareersarneqalissalluni.
