Atuartut pisinnaatitaaffitik nalunngittariaqaraat
Meeqqat Inuusuttullu Oqaloqatiginnittarfiata MIOp aamma Kalaallit Nunaanni ICC'p suleqatigiillutik atuartunut atuagassiaq qulequtaqartoq ’Pisinnaatitaaffeqarpunga!’ saqqummersippaat.
Nunatsinni atuarfinnut tamanut atuagaq kalaallisut danskisullu oqaasertaqartoq agguaanneqassaaq. Atuagaq meeqqat atuarfiini atuartunut akullernut naatsorsuussaavoq saniatigullu aamma ilinniartitsisunut ilitsersuutitaqarluni.
Atuakkami meeqqat pisinnaatitaaffii pillugit isumaqatigiissummi qulequttat arfinillit arlalinnik oqaluttuaarartallit atorlugit sammineqarput. Oqaluttuaaqqat tamarmik apeqqutinik nalornisoornartunik naggaserneqartarput, nalornisoorullu paasiuminartumik akineqartarpoq assersuummullu naleqquttumik pisinnaatitaaffinnik nassuiaateqarfigineqartarluni.
MIO suliassatut siunnersuutinik arlaqartunik suliaqarpoq nittartakkamilu www.mio.gl –mi taakkua saqqummersinneqarumaarput.
