Atuartut nukersortarnerat Nuummi Nuussuup Atuarfiata iliuuseqarfiginialerpaa
Taamatut suliniuteqarnermut pissutaavoq atuartut akornanni unataasoqartarnera aamma unataanissamik sioorasaarisoqartarnera.
Matumani pineqarput meeqqat unataaqqullugit pinngitsaalineqartartut, unataanngikkunillu unatarneqarnissaminnik sioorasaarneqartartut. Naak tamanna meeqqani eqimattakkuutaartuni atuarnerup avataani pisaraluartoq, atuartitsinermut sunniuteqarnerluttartoq atuarfiup pisortaata Jane Kleist Lyberthip oqaatigaa.
Angajoqqaanut kajumissaaruteqarluni saaffiginninnerup saniatigut atuarfimmit kommunimi suleqatigiit SSSPK-kkut kommunimilu miljøarbejderit aamma ataatsimeeqatigineqarput.
Ataatsimiinnermi ajornartorsiutip qanoq iliuuseqarfigineqarnissaa oqaloqatigiissutigineqarpoq, atuarfimmilu immikkut ittumik sammisaqartitsisoqarnissaa isumaqatigiissutigineqarluni, tamannalu SSSPK suleqatigalugu piareersarneqassaaq. Immikkut sammisaqartitsinerit decembari aallartilaarpat ingerlanneqassapput inernerilu pillugit angajoqqaat aggersarneqarumaartut aamma oqaatigineqarpoq.