Atuartut nuannernerusunik timersortinneqartalissapput

Kalaallit Nunaanni atuarfinni timersortarnerup ineriartortinneqarnissaa pillugu Atuarfimmi Timersornermik taaguutillip, Kommuneqarfik Sermersooq Inerisaavillu suleqatigiinnissamik isumaqatigiissuteqarfigai.

Taamaammat Atuarfimmi Timersornermut isumassarsisup, Kim Godtfredsenip, nuannaarutigaa, meeqqat atuarfiini timersortarnerni, fagitut tamanit ingerlanneqartussani, nalunaaquttap akunneri Inatsisartut amerliniarmatigik.

Timersorneq, peqqinnarnerusunillu nerisaqarneq, fagitut tamanit ingerlanneqartartussatut atuarfiit atuutsilissagaat, peqqinnissamik ataatsimiititaliap siulittaasuata, Olga Poulsen Berthelsenip, Inuit Ataqatigiinneersup, Inatsisartuni siunnersuutigaa.

Pinaveersaartitsinernik aaqqissuisoqartillugu meeqqat peqataanerusarnissaat angajoqqaat isumaginerusassagaat siunnersuummi aamma kaammattuutigineqarpoq.

Kim Godtfredsen tamatumunnga isumaqataalluinnarpoq.

- Atuarfitsialammi timersornerup pingaaruteqarluinnarluni inissisimanissaanik naliliiffigineqarnissaa amigaataalluinnarpoq, tassami Kalaallit Nunaanni meeqqat akornanni sukkornermik nappaateqarnerulernissaq meeqqallu puallaraluttuinnarnissaat ilimagineqarmat, Kim Godtfredsen oqarpoq.

Atuarfinni siunissami timersorneq pillugu novembarimi ataatsimiittoqassaaq.