Atuartut nerisaqartinneqarnissaannik suliaq ingerlavoq

Meeqqat atuarfianni atuartunut 10.000-it missaanniittunut nerisaqartitsinerup qularnaatsumik aningaasalersorneqarnissaanik Naalakkersuisut pisussaatinneqassapput. Demokraatit isumaqarput tassunga ukiumut aningaasartuutissat 36 millioni koruunit atorneqartassasut. Demokraatineersup Jens B. Frederiksenip siunnersuutaa taama nipeqartoq, Inatsisartuni ullumi siullermeerlugu oqaluuserineqartoq amerlanerussuteqartunit tapersersorneqanngilaq. Demokraatit siunnersuutaannut tapersiinnginnertik Ilinniartitaanermut Naalakkersuisup Tommy Marøp ima tunngaveqartippaa:

- Naalakkersuisooqatigiit siornali siunniutereernikuaat, aamma lu aningaasanut inatsimmit illuartitsereernikuullutik. Taasuma saniatigut suleqatigiissitamik pilersitsisimalluta.

Meeqqat atuarfimmi nerisaqartinneqartalernissaannut tunngasunik tamanik, aningaasatigut qassillu pisariaqartitsinerannik, tusarniaanernillu suleqatigiissitaq manna suliaqartoq, Tommy Marø oqarpoq.

Atuartut nerisaqartinneqartalernissaannut ukioq manna aningaasanut inatsimmit 3,3 millionet taavalu ukiuni tulliuttuni 2008-miit 2010 ilanngullugu 6,5 million koruunit ukiumut illuartinneqarput. Meeqqat atuartut amerlassusaat eqqarsaatigalugu taakku ikippallaannginnersut Tommy Marø aperigatsinni akivoq:

- Suleqatigiissitap nalilersugaasa pingaarnerit ilagivaat aningaasat eqqortut naniniarnissaat. Atuartut 10.000-it missaanniittut Naalakkersuisooqatigiinniit tamaqqissaamik neqeroorfigineqarnermikkut akuersaarnissaat qulakkeersimanngimmassuk, suleqatigiissitap paasiniassavaa qassit pisariqartitsinersut.

Atuarfimmi nerisaqarnissamut neqeroorut aasareerpat aggustimiit aallartissasoq,

Ilinniartitaanermut Naalakkersuisoq Tommy Marø oqarpoq. Atuartunut nerisaqartitsisarnissamik neqeroorutissaq meeqqanut atuartunut tamanut tunngatinneqassaaq. Siumut, Atassut, Inuit Ataqatigiillu siunnersuummut tapersiinngitsut Kattusseqatigiit Partiiat Demokraatillu siunnersuummut tapersiipput.