Atuartut Naalagaaffeqatigiit pillugit ilinniartinneqarlik
Akissulli tassaavoq naagga. Ilinniartitaanermut ministeriaqarfiup Danmarkimi meeqqat atuarfiit ilinniarnertuunngorniarfiillu peqqusinnaanngilai atuartut sammisanik Kalaallit Nunaannut Savalimmiunullu tunngasunik ilinniartitseqqullugit, ministeri oqarpoq. Tamannalu Edmund Joensenip naammaginngilaa.
-Naalagaaffeqatigiinni ajornartorsiuteqarluta nassuerutigisariaqarparput. Pingaartumik kinguaariit inuusunnerumaat Savalimmiut Kalaallit Nunaallu pillugit ilisimasaqanngingajavipput. Danskit naalakkersuisui iliuuseqartariaqarput ilimasaqassutsimillu qaffassaallutik, KNR-imut oqarpoq.
Meeqqat atuarfianni atuartitsineq ministeriaqarfiup tungaanit Ataatsimut Anguniagassatigut aalajangersarneqarsimapput, tassanilu atuarfiit ataasiakkaat atuartitsineq sunik imaqartissaneraat nassuiarineqarpoq. Atuarfiilli ataasiakkaat nammineerlutik atuartitsinerup imarisaa aalajangersartussaavaat. Tamanna aamma ilinniarnertuunngorniarfinnut atuuppoq. Ministeriaqarfiup atuartitsissutissanut tigussaasunik piumasaqaateqarnissani suliassarinngilaa, Kalaallit Nunaatali Savalimmiullu atuartitsinermut ilanngunneqarnissaannut aporfissaqanngilaq, ministeri allappoq.
Tamannali naammanngilaq, Edmund Joensen isumaqarpoq.
-Minnerpaamik anguniakkani allaqqasariaqaraluartoq oqaatigaa.
Oqaluttuarisaanermik ilisimatusartup Tina Adeke Hoffip atuakkiamini ilinniarnertuunngorniat Savalimmiut pillugit ilisimasaqanngingajavinnerat uparuarpaa, tamannalu tunngavigalugu Edmund Joensen apeqquteqaateqarpoq. Visit Greenlandip aamma danskit Kalaallit Nunaat pillugu ilisimasaannik misissuisimavoq. Misissuinerup taassuma ilaatigut takutippaa danskit 40 procentiisa Kalaallit Nunaannut tunngatillugu imerajuttuuneq, atornerluineq isumaginninnikkullu ajornartorsiutit eqqaasaraat. Aamma amerlanersaat isumaqarput qajaq angallatitut ullumikkut atorneqarnerpaasoq.
