Atuartut iPadiserusuppaat
Tamatumunnga aningaasat atugassat millionit marluk Kommunip aningaasanik illuartitsivigereerpai, aningaasallu siunertamut atorneqartussat sinneri, 10 millionit koruuniusut Villum-ip aningaasaateqarfianit pissarsiarineqarsinnaanissaat isumalluutigineqaannalerlutik.
- Siunertap akisunissaa qularisassaanngilaq. Matumanili meerartatta atortorisaarnerulernerinik kinguneqassaaq, atuartummi IT-lerinermut pikkorinnerulissapput, atuarfimmilu angusarissaarnerulissallutik. Qeqqata Kommuniani IT-lerinermut pisortaq Ulrik Motzfeldt Sivdlek´-mmut taama oqaluttuarpoq.
Qarasaasiaaqqanilli iPad-inik atuartunut tunissuteqarnissamik isuma nutaajunngilaq.
Sisimiunimi Nalunnguarfiup Atuarfiani pisortap, Jonathan Petersenip oqaatigaa qarasaasiaaqqat Apple-meersut atuarfimmi immikkoortortaqarfinni aqutsisunut 2011-mili, tassa ukiut marluk matuma siornali agguaanneqareersimasut:
- Ullutsinni IT-lerineq eqqarsaatigissagaanni meeqqanut inorsarujussualereerpugut. Atuartummi Skole 2-miittut ukioq atuarfiusumi 2013/14-mi iPad-itaartsinneqarnissaat qinnutigereersimagaluarpara iluatsissimanaguli. Taamaammat isumassarsiap taassuma maanna eqqunniarneqalernera nuannaarutigaara, Jonathan Petersen oqarpoq.