Qulaarpaa Atuartut ataasiakkaat qitiutinneqanngitsut

Meeqqat atuarfiini atuartut ataasiakkaat qitiutillugit atuartitsinissaq pingaartinneqarpoq. Naliliinerulli takutippaa tamanna iluatsippianngitsoq.

Atuartut ataasiakkaat ukkatarineqartariaqarput. Tassa Atuarfitsialaap ilaatigut siunertaa, iluatsippallaarsimanngilarli.

Meeqqalli atuarfianni atuartitsineq pissusissamisut ingerlanngitsoq, meeqqat atuarfiannik naliliinermut atatillugu nalunaarusiap saqqummersinneqaqqammersup takutippaa.

Atuarfitsialammi anguniakkat ilinniartitsisut ataatsimut isigalugu malissinnaanngilaat, ilinniartitseriaatsimillu paasinnissinnaaneq aamma killeqassagunartoq nalunaarusiap takutippaa.

Suleriuseq pilersaarusiugaq amigaataasoq

Ilinniartitseriaaseq nutaaq meeqqat atuarfiannik aaqqissuusseqqinnermut qitiulluinnarpoq, atuartut ataasiakkaat ukkatarineqarnissaat pingaartinneqarluni. Atuartut atuarnerminni unammilligassaqartarnissaat, atuartullu ilinniartitsisullu Atuarfitsialaap anguniagaanut naapertuuttumik pilersaarusiorfigineqartarnissaat siunertaalluni.

- Meeqqalli atuarfianni annerusumik taama suleriaaseqartoqanngitsoq naliliinerup takutippaa. Ilinniartitsisut ikittuinnaat atuartut ataasiakkaat pillugit pilersaarusianik malinnillutik atuartitsisarput. Naliliinermi tamanna atuarneqarsinnaavoq.

Atuartitseriaatsit ilikkarluarfiusut meeqqat atuarfianni ullumikkut taassuma saniatigut atorneqartarput. Atuartitseriaaserli taanna ilinniartitsisut ilaannit iluatsippallaarsimanngilaq.
Naak ilinniartitsisut assigiinngitsutigut pikkorissarneqartaraluartut, atuartitsiseriaatsit maannamut iluatsippallaarsimanngitsut nalunaarusiami ilaatigut inerniliunneqarpoq.

Naak Atuartitseriaatsit ilikkarluarfiusut pillugit siunniussat ilinniartitsisunit amerlasuunit paasineqarsimasutut taaneqaraluartut, taamatut atuartitseriaatsit amerlasuunit aamma paatsoorneqarsimasutut isikkoqartut nalunaarummi allaaserineqarpoq.

Atuartut ilaat inuuniarnermikkut ajornartorsiuteqarnertik, faginilu ataasiakkaani ajornartorsiuteqarnertik pissutigalugu, Atuarfitsialammi atuartitseriaatsit USA-mit ilaatigut aaneqarsimasut, ajornartorsiutigisaraat nalunaarusiami aamma tikkuartorneqarpoq.

Aamma atuaruk Qulaarpaa Meeqqat Atuarfiannik naliliinerup ajoquterpassuit qulaarpai

Isummersuutit


 

Pages