Atuartut asiarfissaminnik illutaaqqipput
Ilulissani Mathias Storchip Atuarfiani atuartut aasaanerani atuanngiffeqarnerminni illoqarfiup avataani illuaqqamiissinnaanissaminnut periarfissaqaqqilerput.
Atuartut siornatigut illuuteqarsimagaluarput, isumami tamanna nutaajunngilaq. Ilinniartitsisut ukiut 17-it matuma siornatigut isummersimapput atuartut suleqatigalugit illuaqqiorniarlutik. Tamannalu 1990-ikkut naaneranni, pisortat aningaasaliissuteqanngikkaluartut, piviusunngortinneqarpoq.
Ilinniartitsisut, atuartut sanasullu illu taamani napparpaat, suliffeqarfiit namminersortut aningaasaliinerisigut. Illuli taanna 1999-imi ajoraluartumik nunguilluni ikuallappoq.
Qujanartumilli illu sillimmaserneqarsimagallartillugu
nutaarsuarmik 86 kvadratmeterinik angissusilimmik Panbo-mik taaguutilimmik taarserneqarpoq. Ukiorlu atuarfiusoq 2006/2007 naggaserlugu katersuunnermi atuarfimmut tunissutigineqarpoq.