Atuartut annerit qaammammusiaqalerlik

Danmarkimi Inuusuttut Inatsisartuisa 173-it Folketingimi ataatsimiinnerat ullumi aallartippoq. Nunarput sinnerlugu Sisimiuni Minngortuunnguup Atuarfianeersut atuartut annerit marluk peqataapput.

Minngortunngunnguup Atuarfiani 8.a-meersut Michel Petersen-ip aamma Jeanette Egeberg-ip Inuusuttut inatsisartuinut siunnersuutigaat atuartut angajulliit aningaasarsiaqartinneqalissasut, atuartut angajulliit sunngiffimminni ilinniagassat suliarinagit sulisariaqartarmata.

Siunnersuut akuerineqanngilaq, taamaattorli atuartut anitsiarfinni pisiniarfinnut mamakujuttusiniartarnerat akiorniarlugu, atuarfinni nerisassanik peqqinnartunik tuniniaasalernissap oqaluuserineqarnissaa ataatsimiititaliamit inassutigineqarpoq.

Inuusuttut inatsisartuisa ataatsimiinneranni Danmarkimi qinersinissamut 18-inik ukioqalersimanissap 15-inut appartinneqarnissaa siunnersuutinut ilaavoq.

- Inuusuttuaqqat 15-leereersut akisussaaffinnik assigiinngitsunik peqareerput, soorlu pinerluttulerinermi inatsit tunngavigalugu pineqaatissiisarnermi ukiut 15-it killigitinneqarput. Kinguaassiuutitigut ilaqarnissamut ukiut 15-it killigitinneqarput kiisalu soorlu nakorsiartunut pisinnaatitaaffiit arlallit eqqarsaatigalugit ukiut 15-it aamma killigitinneqarlutik, taamaattumik 15-ileereersimasut qinersinissamut aamma pisinnaatitaasariaqarput, siunnersuuteqartut SF-it inuusuttaasa oqaaseqartitat Kamal Qureshi, aviisimut Politikkin-imut tunngavilersorpoq, siunnersuulli Danmarkimi naalakkersuisunit tapersorneqanngitsoq, Danmarksradio tusarliussivoq.

Danmarkimi Inuusuttut Inatsiartuisa ataatsimiinnerat ullumi aamma naammassineqassaaq.