VIDEO Atuartut angisuungorunik sunngorusunnersut aperissallugit pingaaruteqarpoq
Kommune Kujallermi meeqqat atuarfianiit ilinniarfinnut ingerlaqqinngitsoortartut amerlanerpaajupput. Tassani 59 procentii ingerlariaqqissimanngitsut nalunaarsorneqarsimammata.
Aappaattut Kommuneqarfik Sermersuumi atuartut ingerlariaqqissimanngitsut 44 procentiupput. Qeqqata Kommuniani Qaasuitsup Kommunianilu 33 procentiusut.
Meeqqat atuarfiini 2015-imi naammassisut ingerlaqqinneri:
Naak atuarfiit ilaanni atuartut ingerlariaqqinngitsoortartut amerlagaluartut inuusuttuaqqat ilinniaqqinnissaannut angajoqqaat peqataatinneqarnerisigut atuartullu peqatigalugit pilersaarusiortarnerit pitsaaqutaasartut Minngortuunnguup Atuarfiani pisortaq oqarpoq.
Minngortuunnguup Atuarfiani atuartut meeqqat ingerlalluarput.
- Angisuunngoruit sunngorusuppit? Taanna pingaaruteqartorujussuuvoq eqqartortassallugu atuartut peqatigalugit, Minngortuunnguup Atuarfiani pisortaq, Nivi H. Efraimsen KNR-imut oqarpoq.
Kommune Kujallermi atuartut ingerlariaqqinngitsoortartut amerlanerpaajupput.
- Pisortap tullia assersuutigisinnaavarput, 2012-iminngaanniit tassa arfinilissaa aggustusimi atorfinippoq. Siornaalli illoqarfimmi sumi tamaani atuffatilernikuuvugut. Atuarfeqarpugut arfineq marluk. Aamma ilinniartitsisut ilaannut unamminarsinnaallutik atuarfimmiit atuarfimmut anitsiarfinni arpasaqattaarsinnaasarmata ilanngui, Narsap Atuarfiani pisortaq, Ivalu Motzfeldt KNR-imut oqarpoq.
Sisimiuni, Qeqqata Kommunianiittumi, meeqqat atuartut ataasiakkaarlugit iliuusissamik pilersaarusiorfigineqartarnerat uniinnartartut ikinnunerunerannut pissutaasorineqarpoq. Aamma meeqqat atuarfiata kingorna ukioq ataaseq uninngaqqaarniartut pilersaarusiorfigineqartarput.
