Atuartut ajornartorsiortorpassuit iliuuseqarfigineqarlik

Nunatsinni meeqqat atuarfiini atuartut assigiinngitsutigut ajornartorsiuteqarput:

-Piffissami kingullermi tusartalerpavut meeqqat atuarfiini ilinniartitsisut qasusut, atuartut aqukkuminaannerat pissutigalugu. Atuartut amerlavallaat inuttut atugaqarnertik pissutigalugu naalanngillutillu aqukkuminaattarput. Atuarfiit inunnik isumaginninnermi siunnersortitut ilinniarsimasunik atorfinitsitsisalertuuppata, ajornartorsiutit artornartut sukkanerusumik iluarsiivigineqartalissagaluarput, Mogens Kleist Ilisimatusarfimmi ilinniartoq oqarpoq.

Atuartitsinerup ingerlanneqarnissaata naammassineqarnissaanut periusissat atuarnerullu nalaani atuarfiup atuartunik nakkutilliinera pillugu Namminersornerusut peqqussuteqarpoq, normu 11 majip 14 2003-meersoq. Tassani pineqarput atuartut 10.klasse tikillugu pinngitsoornatik atuartartussat. Aamma taanna imaqarpoq, atuartut ilinniartitsisunik artukkiisut, qanoq iliorfigineqarsinnaajunnarunik, sapaatip akunneranik sivisussusilimmik atuarfimmit anisitaasinnaasut. Kisianni Atuarfiup malittarisassat malillugit Siunnersuisarfik saaffigissavaa immikkut atuartitsinissamik naliliisoqarnissaa piniassammat.

- Siunnersuisarfiup ataani tarnip pissusaanik ilinniagallit ikippallaarput. Taamaattumik Inatsisartuni ilaasortat piaartumik ajornartorsiutip qanoq qaangernissaanut ikiutaasinnaasunik ujartuipallattariaqarput. Uani 10. aamma 11. klassit kisimik ajornartorsiunngillat. Atuartummi 2. klassiniiliinnartut paasinarsisarpoq ajornartorsiuteqartut, taama oqarpoq Mogens Kleist namminneq aamma atuarfinni ilinniartitsisuusarsimasoq.

Ilinniarititsisut kattuffiata IMAK-ip siulittaasua Sivso Dorph oqarpoq, inuiaqatigiit ajoraluartumik atugaat pitsaajunnaariartortut. Ullumikkummi meeqqat amerliartorput sumiginnakkat.

-Atuarfiit kommunillu suleqatigiillutik atuartunik ikiorneqarnissamik pisariaqartitsisunik ikiuinissaminnut piareersaasiortaraluartut, nukiit naammanngilluinnarput. Kommunit ilai tarnip pissusaanik ilinniagalinnik atorfeqartitsipput ikuiuunnissaminnut piareersimasunik, kisianni ikittuinnaat taama periarfissaqarput. Ilumoorpoq 11. klassit atuarfinnit anisitaasinnaaneri, tamanna pissuteqaannarpoq. Namminersornerullutik Oqartussat pisoqaq malillugu 11. klassit pinngitsoornatik angusassaanngimmata, tassa atuartut namminneq piumassutsiminnik 11. klassersinnaapput, taama nassuiaavoq IMAK-ip, tassa ilinniartitsisut kattuffiata siulittaasua Sivso Dorph.

Mogens Kleist aamma oqarpoq sukkasuumik ikiorsiisoqarnissaq periarfissiuunneqartariaqartoq tassa atuarfiit inunnik isumaginnittunik atorfinititsisinnaalernissaat Inatsisartunit oqaluuserineqarlunilu aalajangiiffigineqartariaqartoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat