Atuartut 12 procentii tunillanneqarsimapput

1.klassimi kiisalu 10. aamma 11.klassimi atuartut sakialluummik nappaateqarsoralugit misissuinerit naammasseqqammerput. Atuartut 12 procentii sakialluummik TB-mik tunillatsissimasut nalunaarummi atuarneqarsinnaavoq.
Allattoq Mads Lynge
marsip 07-at 2008 16:46

Peqqissutsimut Naalakkersuisoq Arkalo Abelsen kisitsisit saqqummiunneqartut eqqarsarnartoqartinnerai aperineqarami ima akivoq:

- Meeqqat pineqartut tunillatsissimagaluarlutik meeraqatiminnik inunnilluunniit allanik tunillaasinnaanngimmata erseqqissaatigissavara. Meeraq ataaseq meeqqalluunniit marluk taamaallaat tunillaasinnaasut misissuinermi paasineqarpoq, taakkualu katsorsarneqalereerput, Arkalo Abelsen oqarpoq.

Nakorsaaneq Karin Ladefoged sakialluut akiorniarlugu suleqatigiissitaliamiinnerminut atatillugu misissueqataavoq, tunillatsinnaveersaarnissarlu pillugu atuartut iliuusissaat taakkartorpai:

- Pujortartilluni allanik millussisitsinaaveersaartoqartariaqarpoq, sodavanditukkamillu allanik najorsisitsinaveersaartoqartariaqarluni. Maanngaannaq qitserannginnissaq aamma pingaaruteqarpoq, quersoreernerullu kingorna qitserannginnissaq pingaaruteqarluni, nakorsaaneq Karin Ladefoged oqarpoq.

TB-p akiorniarneqarneranut atatillugu atuartunik misissuinerni atuartut 459-it misissorneqarput, arlaannaalluunniillu sakialluummik napparsimalersimanani.

Kujataani innuttaasut tamarmik qinnguartaanikkut puaasa misissorneqarnissaat ukioq mannamiit neqeroorutigineqassaaq, ukiullu allortarlugit misissuisoqartassalluni.

Quersoqattaarneq, unnuakkut kiaguttarnerit, sanigorneq, nererusussuseerunnerlu sakialluuteqarnermut ilisarnaataasinnaapput.

Sakialluut TB pillugu nittartakkami www.peqqik.gl-imi annertunerusumik paasisaqarsinnaavutit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq