Atuartunut annernut qaammatisiutit
Meeqqat atuarfianni atuartut annerit atuarnerminnik naammassinnikkiartulersut qaammatisiutinik ilinniaqqinnissamut periarfissat pillugit paasissutissartalinnik tunineqartussanngorput.
Atuartut annerit ilinniaqqinnissamut paasissutissartalinnik qaammatisiuteqalernissaat, Inatsisartut Naalakkersuisullu ilinniartitaanerup sammineqarnerunissaanik kissaateqarnerannik tunngaveqartoq, Ilinniartitaanermut Pisortaqarfik allappoq.
-Imminut isumagisinnaanngorluni, ineriartorsinnaalluni inuiaqatigiinnilu inuunermi peqataalluarsinnaanngorluni ilinniagaqarnissap pingaaruteqassusianik inuusuttut oqaluttuunneqartarnissaat, ilinniagaqalernissamullu qanoq ilillutik paasisassarsiorsinnaanerminnik ilisimatinneqarnissaat pingaaruteqarpoq, Ilinniartitaanermut Pisortaqarfik allappoq.
Atuartunut annernut qaammatisiutini ilinniarfissat assigiinngitsut, ilinniartitaanerit aalajangersimasut, sumilu ilitsersorneqarsinnaaffiit pillugit paasissutissat takuneqarsinnaassapput. Atuartut annerit qaammatisiutissaat atuarfeqarfinnut tamanut maanna nassiussuunneqareerput, sapaatillu akunnerata matuma ingerlanerani tunniussuunneqarsinnaassasut, Ilinniartitaanermut Pisortaqarfik ilisimatitsivoq.
