Atuarsinnaananilu allassinnaannginneq innarluutaavoq

Innarluutillit sapaatip-akunneqartinneqarneranni 41-mi innarluutillit ilinniagaqarnissamut suliffeqarnissamullu periarfissaat qulequtaritinneqarpoq.

- Naqinnernik ilisarinnissinnaanermik ajornartorsiuteqaraanni ilinniagaqalernissamut aqqut takisaqaaq, taama oqarpoq Marit Eliassen, 38-nik ukiulik Narsameersoq:

- Imminut tatiginanngitsukuluuvoq, taavalu toqqorternarluni. Soorlu pineqaruit una allalaaruk, qamuunarujussuaq tigunartarpoq peqqusiileqinarluni. Naa, qanoq allassavara, immaqa kukkulerpara. Naak atuarsinnaagaluarlunga, oqarpoq.

Marit Eliassen allassinnaanngitsut atuarsinnaanngitsullu pikkorissartinneqarneranni peqataasarsimavoq.

- Ammanerulerpunga tatiginerulerlungalu. Kisianni suli ilinniakkamik aallartitsinngilanga. Sunissarami eqqarsaatigeqqaartariaqarpoq.

Naqinninnernillu atuarfeqalivissuuppat ilinniarnissani eqqarsaatigisinnaaqaa. Maannamummi ilinniarsimallutillu allagartartaartut takugaangamigit assut usoruummertarpoq.

- Imminut ajukkunnartarpoq, soorlu inoqatit usornartaqaat allagartartaarlutik naammassisut. Ataasiaannarnanga qullisarpunga usorullunga. Kisiannili kimulluunniit oqassananga.

Marit Eliassen siuariartornerarpoq, imminummi tatigiartuinnavikkami.

- Allannissannut uanga soqutigisaqartuunngikkaluarama, maannakkut tassa mobili aamma atorlugu allanniartalerpunga. Ikiortaasorujussuuvoq, soorlu allaqateqalaarluni, kalaallisut allanniarsaraluni, taavalu nipisiorujoorluni. Arnaq 38-inik ukiulik aamma pappilissamut allattalerluni unnersiorpoq, illariariarlunilu oqarluni:

- Kisianni tassa eqqarsaatigineqanngilara sunngorniassuunga, suli qamaninniinnginnami, kisianni tassa naqinnernik ilisarinnissinnaanngitsunut atuarluni nuannersorujussuuvoq, pissarsiaqarnarlunilu inuttut ammarnartukuluugami.

Marit Eliassen Narsami atuarsinnaanngitsut allassinnaanngitsullu pikkorissartinneqarneranni, qaammatip ataatsip missaannik sivisussuseqartuni, marloriarluni peqataareerpoq.

Naqinnernik ilisarinnissinnaanngitsut atuarfivissaat Narsap Kommuniata aappaagu 2008-mi aallartittussatut pilersaarutigaa.