Atuariartortitaasimasut eqqaamasalikkersaassapput

Tine Bryld-ip atuakkiaata "I den bedste mening"-ip saqqummernerani taassumalu filmiliarineqarnerani oqallinneq pilersinneqarsimasoq nanginniarlugulusooq unnugu aaqqissuusisoqarpoq.

Ajunnginnerpaamik isumaqarluni atuartiartortitsisoqartarsimavoq. Meeqqanulli danskinut ilaqutariinnut aallartinneqartarsimasunut Nuummullu uteraangamik meeqqat angerlarsimaffiannut inissinneqartarsimasunut atuariartorneq kinguneqapilutitsisimavoq.

Unnugu saqqummiisussaq, Louise Fontain 60-kkunni Danmarkimut aallartitaasimasut ilagaat, ilaqutarsiarisimasaminillu meerarsiavinngorsimalluni.

Inuusuttuullunili sammineqartoq, inuunermini paatsiveerutitsisimasoq paasiniarlugu, misissuiffigilersimavaa.

Københavnimi Illu Atlantikumi 2007-mi assinik saqqummersitsivoq, atuariartortitaasarnermut tunngasumik. 2008-milu Kulturikkut illorsuarmi Taseralimmi saqqummersitsisimavoq taasaminik "Qanilaakkat puisinnguuvoq". Tassani nunatsinnut tikeraartarnermini ineriartornerup sukkaqisup malinnaavigisimasami ersersinneqarnissaa siunertarisimavaa.

Meeraalluni nunamut allamut aallartitaanermit eqqaamasat quianartortaqarlutillu alianartortaqarput. Louise Fontainillu neriuutigaa saqqummiussineq oqallinnermik ammaassiumaartoq.

Atuariartortitaasimasut allat qanigisaasullu Café Taseralimmi oqaluttuarnissaminnut periarfissaqassapput.