Atuarfiup siulersuisuini ilaasortaq: Angajoqqaat peqataassapput
Meeqqat atuarfiini inuusuttullu ilinniarfeqarfiini atuartut perorluarsimannginnerat, ataqqinnissusikippallaarnerat aammalu ilaatigut perorsarluarsimannginneri ajornartorsiutaanerpaajusutut taakkartorpai. Atuarfeqarneq kingullertigut isigineqarnerminit ajornerulaanngilaq.
-Meeqqat atuarfiat uanga isumaga malillugu ajortumik imaluunniit ajornapallaamik ingerlanngilaq. Ilinniartitsisut ilinniarluarsimasut tunniusimasullu pigaavut, aamma ilinniaqqinnissaminnut periarfissagissaarput. Atuarfitsialak aallaavigalugu ilinniartitaaneq sanarfivarput, taannalu meeqqatta pitsaasumik atuartitaanissaannut pitsaalluinnartunik periarfissiivoq, Alibak Hard oqarpoq.
Angajoqqaat qitornamik pitsaasumik ilinniagaqarnissaannut annikippallaartumik peqataanerisa kingunerisaanik nunatsinni atuarfinni ilakkagaqarniarnissamut avatangiisit pitsaasut angunissaat ajornakusoorsinnaavoq. Atuartut nammineerlutik tunniussaqartussaapput, angajoqqaalli aamma atuarfik ilinniartitsisullu tapersersortariaqarpaat, minnerunngitsumillu meeqqat piumasaqarfigineqaraangamik suliaqartarnissaat qulakkeertariaqarlugu.
-Angajoqqaat sinniisaattut ukiuni tallimani aviisitigut allaaserinnittarlunga, toqqaannartumik saaffiginnillunga ataatsimiinnernilu angajoqqaat qitornamik atuartitaanerat pillugu oqaloqatigiinnissamut kajumissaartarpakka. Nipaannersuarmik iliuuseqarniannginnermillu naapitsiinnartarpunga. Tasersuup Atuarfiani atuartut 460-iusunit angaqqaajusut 10%-iinnaat ataatsimiinnernut takkuttarput. Tamanna ajorpallaaqaaq!, Alibak Hard aalajangersumik oqarpoq.
