Atuarfiup pisortaa: Kalaalimerngit taqussani ilaatinneqarlik

- Kalaalimerngit meeqqat taquaanni ilanngunneqartalissagaluarpata, assut iluassagaluarpoq. Taamaasilluni kalaallit kulturiat ersarinnerusumik, malunnaatilimmillu atorneqalissagaluarmat, Edvard Jensen Atuarfik Samuel Kleinschmidtimi pisortaq taama oqarpoq.

Nammineq meeqqat atuarfiini taqussat pillugit, aasap kingorna atuutilersinneqarsimasoq iluarisimaarpaa. Siornatigut puussiarsuit ikinngitsut atorlugit taqussat eqqaannarneqartaraluarput, atuartut taqussat mamarinngimmatigit. Maannali sapaatip akunneranut marloriarluni kissartunik nerisoqartalernikuuvoq, taannalu ajunngitsumik atuartut akornanni tiguneqarluni.

Kommuneqarfik Sermersuumi atuarfeqarfiup pisortaata Hans Peter Brobergip  siunnersuut paasilluarsinnaavaa. Taamaattumillu atuarfeqarfinnut taqussiortut namminersorlutik  tamanna pillugu oqaloqatigineqarumaartut unnerpaa.

- Isumassiassatsialaavoq kalaalimerngit taqussanut ilanngunneqartalissagaluarpata, peqqinnartuummatalu, Hans Peter Broberg knr.gl-mut oqarpoq.

Atuarfiit ullut tamarluinnangajaasa, angajoqqaanit atuartuniillumi naammagittaalliutinik tigusaqartuartarsimapput, aasalli kingorna tamanna takussaajunnaarsimavoq.

Kommuneqarfik Sermersuumi kisiartaalluni Nuuk atuarfimmi taqussanik namminersortunut suliakkiisimavoq. Paamiut, Illoqqortoormiut Tasiilaq nunaqarfiillu atuarfimmi sulisut atorlugit taqussiortarput.