Atuarfiup Inussuup ammarneqarnissaa aggustimi qulakkeerneqarpoq
Nuummi atuarfiup Inussuup, ammarnissaanut ukiut marluk kinguaattooqattaareerluni, ukioq manna aggustimi atuarfigineqarsinnaanngussaaq. Kommuneqarfik Sermersuup tamanna KNR-imut uppernarsarpaa.
Atuarfik Inussuup ammarneqarnissaanut ajornartorsiutit annertuut peqqutaallutik ukiuni marluni kinguartinneqaqattaarpoq.
Allattoq Jonna Enoksen Dahl
juunip 19-at 2026 07:30
Atuarfik Inussuk 2024-mili ammarneqartussatut pilersaarutigineqaraluarpoq, aatsaat ukiut marluk qaangiummata atuarfiup kiisami ‘ammarnissaa’ ilimagineqarpoq.
Atuarfiup Inussuup pilersaarutit malillugit aggustimi ammarnissaa Kommuneqarfik Sermersuumi Sanarfinermut Avatangiisinullu ingerlatsivimmi pisortap Søren Sohn Krog Pedersenip oqaatigaa.
-Ukiup atuarfiusup tulliuttup aallartinnerani atuarfiup ammarnissaa suli naatsorsuutigineqarpoq. Piffissami aggersumi ammaanersiorneq pillugu sukumiinerusumik paasissutissiinissarput naatsorsuutigaarput.
Ajornartorsiutit arlaqartut
Atuarfik 2024-mi pilersaarutit malillugit atorneqaqqaartussaagaluarpoq, ammarneqarnissaanut ajornartorsiutit annertuut peqqutaallutik ukiuni pingasungajanni kinguartinneqaqattaarpoq.
Atuarfiup toqqammavia nunap qerisarneranit qummut 5 centimeteringajammik nikeriarsimavoq aamma igalaakkut betonimilu katiffiit akornisigut erngup isaasarsimaneratigut oqorsaat masatsertarsimasoq paasineqartoq, KNR-ip septembarimi siorna allaaseraa.
Ilaatigut iikkat gipsiusut ikkussuunneqarsimasut, isumaqatigiissummut naapertuutinngitsutut sanaartortitsisumiit uparuarneqarput.
Sanaartornissaq pillugu isumaqatigiissut naapertorlugu, gipsi qisunnik krydsfinérpladenik tunuliaquteqartussaasimagaluarpoq, taamatulli suliarineqarsimanngimmat iikkat amerlanerit piiarneqartariaqalersinnaanissaat aarleqqutigineqarpoq.
Ikuallattoornermi isumannaallisaanermi teknikkikkut ajornartorsiuteqarnera Kommuneqarfik Sermersuup islandimiullu sanaartugassanik suliaqartartut Istakip piffissami sivisuumi aamma isumaqatigiinngissutigaat. Isumaqatigiinnginneq atuarfiup naammassiffissaanik pilersaarut uniorlugu suli atulinnginneranut pisortatigoortumik nassuiaatigineqartarpoq.
Sanaartornermut aningaasartuutit katillugit 633.739.112 koruuniusut, Sermitsiap siorna septembarip qulingiluaanni allaaseraa.
