Atuarfiup Inussuup ammarneqarnissaa aggustimi qulakkeerneqarpoq

Nuummi atuarfiup Inussuup, ammarnissaanut ukiut marluk kinguaattooqattaareerluni, ukioq manna aggustimi atuarfigineqarsinnaanngussaaq. Kommuneqarfik Sermersuup tamanna KNR-imut uppernarsarpaa.
Atuarfik Inussuup ammarneqarnissaanut ajornartorsiutit annertuut peqqutaallutik ukiuni marluni kinguartinneqaqattaarpoq. Assi © : KNR / Markus Valentin
Allattoq Jonna Enoksen Dahl
juunip 19-at 2026 07:30
Share to Facebook Share to Twitter Copy link Print
Atuarfik Inussuk 2024-mili ammarneqartussatut pilersaarutigineqaraluarpoq, aatsaat ukiut marluk qaangiummata atuarfiup kiisami ‘ammarnissaa’ ilimagineqarpoq.
 
Atuarfiup Inussuup pilersaarutit malillugit aggustimi ammarnissaa Kommuneqarfik Sermersuumi Sanarfinermut Avatangiisinullu ingerlatsivimmi pisortap Søren Sohn Krog Pedersenip oqaatigaa.
 
-Ukiup atuarfiusup tulliuttup aallartinnerani atuarfiup ammarnissaa suli naatsorsuutigineqarpoq. Piffissami aggersumi ammaanersiorneq pillugu sukumiinerusumik paasissutissiinissarput naatsorsuutigaarput.
 

Atuarfik Inussuk

Atuarfiup Inussuup isikkussaa 2019-mi saqqummiunneqarpoq.
 
Sanaartorneq 2020-mi aallartinneqarpoq. 
 
Atuarfissaq 2024-mi siullermeerluni ammartussaagaluarpoq.
 
Atuarfik Inussuk Nuummi atuarfinnut marlunnut Atuarfik Ukaliusamut, USK-imut, Atuarfik Samuel Kleinschmidtimullu, ASK-imut, taartissatut sanaajuvoq. Atuarfiit USK-ip aamma ASK-ip oqoqarnerat pissutigalugu ukiaq qaammammik ataatsimik akunneqaannartumik matuneqarput.
 
Taakkunanilu atuarfinni atuartut 1000-it missaanniittut Nuummi sumiiffinni assiginngitsuni atuartinneqartariaqarput.

 
Ajornartorsiutit arlaqartut
Atuarfik 2024-mi pilersaarutit malillugit atorneqaqqaartussaagaluarpoq, ammarneqarnissaanut ajornartorsiutit annertuut peqqutaallutik ukiuni pingasungajanni kinguartinneqaqattaarpoq.
 
Atuarfiup toqqammavia nunap qerisarneranit qummut 5 centimeteringajammik nikeriarsimavoq aamma igalaakkut betonimilu katiffiit akornisigut erngup isaasarsimaneratigut oqorsaat masatsertarsimasoq paasineqartoq, KNR-ip septembarimi siorna allaaseraa.
 
Ilaatigut iikkat gipsiusut ikkussuunneqarsimasut, isumaqatigiissummut naapertuutinngitsutut sanaartortitsisumiit uparuarneqarput.
 
Sanaartornissaq pillugu isumaqatigiissut naapertorlugu, gipsi qisunnik krydsfinérpladenik tunuliaquteqartussaasimagaluarpoq, taamatulli suliarineqarsimanngimmat iikkat amerlanerit piiarneqartariaqalersinnaanissaat aarleqqutigineqarpoq.
 
Ikuallattoornermi isumannaallisaanermi teknikkikkut ajornartorsiuteqarnera Kommuneqarfik Sermersuup islandimiullu sanaartugassanik suliaqartartut Istakip piffissami sivisuumi aamma isumaqatigiinngissutigaat. Isumaqatigiinnginneq atuarfiup naammassiffissaanik pilersaarut uniorlugu suli atulinnginneranut pisortatigoortumik nassuiaatigineqartarpoq.

Sanaartornermut aningaasartuutit katillugit 633.739.112 koruuniusut, Sermitsiap siorna septembarip qulingiluaanni allaaseraa.
Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Spirali pillugu oqaluttuat nuanniitsut inuit pisinnaatitaaffiinik unioqqutitsinerusut

Ilisimatusartoq: Canada saammaateqatigiinniarnerup qanoq pisinnaaneranik pisinnaannginneranillu takutitsisoq

Múte B. Egede EU-mi: Allat pitinnagit peqataaneruleritsi

Illersornissaqarfiup Narsarsuarmi mittarfiup atuuffissaa sivitsoraa

Arnat spiralilersorneqarsimasut siulliit taarsiivigineqartut

Danmark kalaallinut peqqissariarnissamik innersuunneqartunut ataavartumik akiliisalersoq