Atuarfitsialak Hawaii-imut
Hawaiimiup Tasha R. Wyatt-ip ilisimatusarnini Nunatsinni atuarfinni ingerlassimavaa, Atuarfitsialaallu piviusunngortikkiartuaarneqarnera ukiuni kingullerni malinnaavigisimallugu.
Meeqqat atuarfianni ilinniusiatigut ”nunasiaajunnaarnissaq” allalluunniit kulturiinit qulangersimaneqarunnaarnissaq Atuarfitsialaap siunertaanut ilaavoq.
Nunat avannarliit atuartitseriaasiannik qimatsiartuaanermut, nunatsinni meeqqat silarsuaannut kulturitsinnut naleqquttumik naleqqussaanissaq aamma siunertaavortaaq, oqaluttuarisaanikkut ulluinnarnilu inuunitsinni, meeqqat atugaannik naleqqusarnissaq, taamaaliornikkut nunasiaanerup sunniutigisimasai kalaallit atuarfeqarfianiit qimagutsikkiartuaarneqassammata.
Hawaiimi nunatsinnut assingusunik suliniuteqartoqarpoq, atuarfiit amerikamiorpalaarun-naartinniarneqarput, Hawaiimiullu kulturianut naleqqussarniarneqarlutik.
Tasha R. Wyat ukiualunni nunatsinniissimavoq Hawaiimilu ilinniartitseriaaseq malillugu kalaallinik ilinniartitsisunik ilinniartitsisarsimalluni, ilinniartitseriaaserlu tamanna USA-mi Canadamilu eqqilinnut ukiuni kingullerni atorneqalersimavoq.
Tasha Wyattsip suliai Ilinniaatinut Instituti- Inerisaavik, Hawaiimilu Universiteti suleqatigalugit piviusunngortinneqarsimapput.
