Atuarfitsialak anguneqarneq ajulerpoq

Qaasuitsup Kommuneaniit, Kommune Kujallermiit aammalu Qeqqata kommuneaniit, Atuarfeqarnermut Ataatsimiititaliami Siulittaasut pingasut, isumaqarput Atuarfitsilak imminermi isumaa anguniagaalu ajunngikkaluartut, suliatigulli atuutsilernissaa ajornakusoortoq.

-Uanga nammineq oqartuaannarpunga, atuarfitsialaap inatsisaa immineq isumaa ajunngilluinnaqqissaartoq immaqalu nunarsuarmi pitsaanerpaasoq, kisianni ingerlanniarneqarnera aammalu atuutsinniarneqarnera arriippallaarujussuarpoq, Qaasuitsup kommuneani Atuarfeqarnermut Ataatsimiititaliami Siulittaasoq, Kristian Broberg, taama oqarpoq.

Tassungalu tunngatillugu, Qeqqata Kommuneanit Atuarfitsialaap anguniagai ilalersorpaat, equngasoqarneralu suleqatigiinnikkut aaqqiiffigineqarsinnaanerarpaa.

-Atuarfitsialak imminerluni siunertamigut ajunngilaq, ukua ikaarsaarnermi taamatut pisoqarsimanera immaqaluunniit angusat taamatut inissisimanerat nassuiaatissat arlaqarsinnaapput, atuarfik kisimi nassuiaatigineqarsinnaasuni uani kisimi pisuutinneqarsinnaanngilaq, Qeqqata Kommuneani Atuarfeqarnermut Ataatsimiititaliami Siulittaasoq, Evelyn Frederiksen taama oqarpoq.

Taamatullu oqarnermini erseqqissaatigaa, atuarfiup saniatigut angajoqqaat atuarfillu meeqqap angusaqarluarnissaa anguniarlugu suleqatigiilluartariaqartut.

Kommune Kujallermiillu Karla E. Bisgaardip, aamma meeqqat atuarfianni atuartut angusaluttut takusinnaasimavai, Atuarfitsialaallu tunuliaqutaa ilumut anguneqarsimanersoq isornartorsiorlugu.

-Immaqa suli taanna anguniagaq, Atuarfitsialaap tunaartarisaa suli anguneqavissimanngitsutut oqaatigisariaqassooq

Kommune Kujallermi Atuarfeqarnermut Ataatsimiititaliami Siulittaasoq, Karla E. Bisgaard taama oqarpoq.

Atuarfeqarfinnut aaqqiissutissaasinnaasut
Kommuneqarfiillu uku pingasut atuarfinnut aaqqiissutissanik assigiinngitsunik suliniuteqarnerarput.

Kristian Broberg isumaqarpoq, ilinniartitsisut tuluttuinnaq qallunaatuinnarlu oqaluttut pisariaqartinneqartut.

-Tuluttuinnavik qallunaatuinnarlu oqaluttunik ilinniartitsisunik piffinni assigiinngitsuni angalasarsinnaasunik peqalerutta, qularinngilara atuartitsinerit taakkununnga oqaatsinut tunngasunik tunineqarsinnaanissaat pisinnaassangaluartoq, Kristian Broberg oqarpoq.

Atuarfeqarfiup iluani atuisuusut suleqatigiinneruneratigut Karla E. Bisgaardip ajornatorsiummut aaqqiissutissaanerarpaa.

-Atuarfiit siulersuisuni suliniarneq nukittorsarneqarsinnaagaluartoq qaninnerusumik suli, atuarfeqarfiit angajoqqaat meeqqallu suleqatigiinnerisigut

Evelyn Frederiksenilli atuarfinni qallunaatut tuluttullu ilinniartitsisarnerit amerlisinneratigut aaqqiissuteqarniarput.

-Qeqqata Kommunea Sermersuup Kommuneanut sanilliullugu tiimit atorneqartartut meeqqanut atuartitsissutigineqarlutik minnernut, taakkua sermersuumi qaffasinnerupput, taamaammallu nallersuunniarluta ukioq atuarfiusoq tullianiit tiimit iluarsaappagut, meeqqat minnerit tuluttut aallartinniassammata aammalu qallunaatut siusinnerusukkut, Evelyn Frederiksen KNR-imut taama oqarpoq.

Atuarfitsialaap isumaa pitsaasorineqaraluartoq, kisitsisit killormuanik oqaluttuarput.