Atuarfitsialaap ingerlanneqarnera naammaginanngilaq

Nuummi atuarfimmut namminersortumut meeqqaminik marlunnik allatsitsisoq oqarpoq Atuarfitsialaap ingerlanneqarnera naammaginanngimmat meeqqami nuunnissaat kissaatigalugu.

- 2002-mili eqqartulermassuk friskoleliorniarlutik maani Nuummi eqqarsaatigilerpara meeqqama tassani atuarnissaat. Pissutigalugu Atuarfitsialak neriorsuutit malillugit ingerlanngimmat, angajoqqaaq oqarpoq.

Ditte Junge Pedersenip erni 3. klasse-mut pannilu 4. klasse-imut allatsippai. Qinngasaarinerit annersaanerillu meeqqat atuarfigisaanni maanna ulluinnarsiutaalersut meeraasa oqaluttuarisaannarpaat, anaanaasullu neriuutigaa atuarfimmut atuartukitsumut nuunnermikkut nuannernerusumik ulluinnaqalissasut. Atuakkat pinnagit kopiiginnakkalli atorlugit atuartitsisarnerit, Ditte Junge Pedersenip aamma naammagiunnaavissimavaa. Taamaattumik Nuuk International Friskole meeqqat ataasiakkaat immikkoorutaat piginnaasaallu aallaavigilluinnarlugit ingerlaniarmat qilanaarpoq, sualummik aamma qitornai.

- Nuannaartorujussuupput, soorunami isumaqatigeeqqaarpugut, oqaloqatigeqqaarlugit allatsippakka, Ditte Junge Pedersen oqarpoq.

Atuarfimmut namminersortumut meeqqap allatsinnerani 30.000 koruuni qularnaveeqqutitut akilerneqartussaavoq, atuarnerlu aallartippat ukiumut meeqqamut ataatsimut 31.000 koruuninik akiliisoqartassaaq. Atuarfittaassaq Nuup Nuussuaani allakkerivitoqqamiittussaq allanngortiterlugu aallartinneqareerpoq.