Atuarfinni pisortat: Avingarusimaneq ajornartorsiutaanerpaavoq
Jørn Holbechip Gustav Brandtillu avinngarusimaneq peqqutaanerpaanerarpaat:
- Ajornartua uaniikkami, taama avinngarusimasumiikkaanni misiliiniarnermi tusartakkat kingulliit imaapput, soorlu illoqarfinni annerni najugaqaraanni inigisat annaanissaat ersissutigineqartarpoq, uterunik utaqqisunut ilanngunnissartik pinngitsoorniarlugu misiliinissaq tunuarsimaassutigisarpaat, Gustav Brandt oqarpoq.
Illoqarfiillu annerit periarfissaqarnerupput:
- Inuit pisoqarfinni sulinngiffinnilu sammisassalinniikkusunnerusarput. Nuummi, Ilulissani Sisimiunilu tamakkoqarpoq. Paaqqinnittarfigissaarneruppulli, tamakkuli peqqutaaqataasinnaapput, Illoqqortoormiuni Einer Mikkelsenip atuarfiani pisortaq, Gustav Brandt oqarpoq.
Jørn Holbechilu isumaqarpoq nammineq peqqutaaqataasinnaalluni, ilinniartitsisut kalaallisut oqaasillit isigisaanniit:
- Oqaaserisamik paasineqarnissaq pisariaqarpoq, aqutsisulli oqaloqatigilluarnissaat pisariaqarpoq, malunnarporli tunumi qallunaamik aqutsisoqarnera kulturikkullu assigiinngissuseqarnerput, Tasiilami atuarfiup pisortaa, Jørn Holbech oqarpoq.
Tasiilap atuarfiani 56-inik ilinniartitsisoqarsinnaasoq 24-t qallunaajupput. Taakkuli nunatsinni atuarfeqarfinni amerlassuseq eqqarsaatigigaanni amerlanerpaajullutik. Einar Mikkelsenillu atuarfia septemberip aallaqqaataaniit qallunaat ilinniarsimasut arfinillit sulisorissavaat, saniatigut kalaallit sisamaannaasut.
Ajornartorsiut anigorniarlugu qanoq iliortoqassava? Gustav Brandt Hans Peter Broberg isumaqatigalugu oqarpoq akissarsiat saniatigut ajunngitsorsititsinissaq aqqutissaasoq. Tamannali Jørn Holbechip akuersaarsinnaanngilaa:
- Ilaquttat qimannissaat artornartoq paasisinnaavarput, tassaavorli ajugaaniarfissaq annerpaaq, Jørn Holbech oqarpoq nangillunilu:
- Periarfissat ilagaat timelæreritut sulisut ilinniagaqalernissaat tamakkulu eqqumaffigaavut. Tamakkuuppulli siuariartornissamut periarfissat pitsaanerpaat. Takusinnaavarput siumut sivisuumik isiginninnerusoq, annikitsumillu siuarsaasussaalluni, kisianni siuarsarfissat tamaasa ilanngukkusuppagut, Jørn Holbech oqarpoq.
Paamiuni Tuiisap atuarfiani pisortat oqaluunniaraluaratsigit iluatsinngilarput.
