Atuarfinni igalaat aserorterneqarsimasut
Atuarfik Samuel Kleinschmidtimi igalaat 16-it septembarip ulluisa 17-iata unnuaani aserorterneqarsimapput, tamatumalu saniatigut Ukaliusap atuarfiani igalaat arlallit aamma aserorterneqarsimallutik.
Kommuneqarfik Sermersooq nittartakkamini taama allaaserisaqarpoq.
Kommune atuarfiullu aqutsisui suliniutinik pitsaaliuinermut tunngasunik assigiinngitsunik misileraagaluarput, taamaattoq aserorterinerujussuup unitsinnissaanut Nuummi innuttaasunit ikiorneqartariaqartut, Lone Nukaaraq Møller, Meeqqanut Atuarfeqarnermullu ingerlatsivimmi nalunaarummi paasissutissiivoq:
- Angajoqqaat meeqqaminnik oqaloqatiginninnissaannut unnukkullu illoqarfimmiittarnerisa nakkutigisarnissaannut kaammattorpavut. Inuusuttut aserorterisartut amerlagunanngikkaluartut, inuusuttut allat aserortereqataarusunnginnermik oqaaseqartalersinnaanerat aserortererusukkunnaarnermik kinguneqarsinnaavoq, Lone Nukaaraq Møller nalunaarummi oqarpoq.
AAMMA ATUARUK Kalaallit Nunaanni Politiit: Sisimiuni aserorterinerit amerliartortut
Innuttaasuttaaq tamaasa unnukkut atuarfinnik nakkutiginninnerulernissaannik ikiuuteqqullugit kaammattorusukkitsik aamma oqaatigaa.
