Demokraatit: Atuarfinni assinik avitseqatigiittarnermut tunngasunik paasissutissiisoqartalerli

Tamataqanngingajalluni assiliisarnerit kingunipiloqarsinnaasut, Nakuusami meeqqat isummersorfiani ilaasortaaq meeqqallu atuarfianni 10. klassertoq, Michelle Andersen, isumaqarpoq:

- Assit kukkusumut nassiuttoorneqarsinnaapput. Asseq ingerlateqqittaqattaarneqarpat taava siunissami inuit ima eqqarsalissapput: "Unamaa niviarsiaraq imaluunniit nukappiaraq taamaattunik assinik nassiussinikuusoq," Michelle Andersen oqarpoq.

Meeqqat atuarfianni angajulliit atuartinneqarnerini MMS imaluunniit nittartakkakkut naapittarfikkut tamataqanngitsunik assinik avitseqatigiittarnermut tunngasunik paasissutissiisoqartalernissaa Demokraatit siunnersuutigaat.

- Akisussaaffigisariaqarpagut innuttagut toqqissisimanartumik siunissami imminut innarlernatik suliffittaarnissaminnut immaqaluunniit siunissaminni inersimasunngorlutik toqqissillutik inuusinnaaniassammata, Demokraatineersoq, Nivi Olsen, oqarpoq.

Siunnersuut ataasinngornermi aappassaaneerneqarmat Inatsisartunit akuersissutigineqarluni taasissutigineqarpoq. 

Tamannalu Ilinniartitaanermut Naalakkersuisumit aamma taperserneqarpoq. 

Taamaammat atuarfinni ilikkagassatut anguniagassat ukiaru Inatsisartut ataatsimiinnissaanni nalunaarusiami saqqummertussami ilanngunneqarniarpoq. Meeqqammi illersorneqartariaqartut, naalakkersuisoq oqarpoq.

- Taamaammat illersuissagutta taavalu inuiaqatigiit taamatut iliortarnerat allanngortissagutsigu taava meeqqat aallaavigalugit iliuuseqarnissaq taanna avaqqunneqarsinnaanngilaq, ilinniartitaanermut naalakkersuisoq Doris Jakobsen taama oqarpoq.

Inatsisartullu ukiaru ataatsimiinneranni nalunaarusiaq saqqummiunneqartoq akuersissutigineqassappat siunnersuut aappaagu atuutilersinnaassaaq.