Atuarfinni aatsaat aallaasersortoqalinngilaq

Tysklandip kujasinnerusortaani atuarfimmi ippassaq aallaasersorneq, atuarfinni toqoraanerit siullersarinngilaat.
Allattoq Elisa Isaksen
marsip 11-at 2009 17:24

Atuarfinnilu aallaasersortarnerit inatsisit sakkortusinerisigut pinngitsoortinneqarsinnaasimanngillat.

Illoqarfik Widenden, Stuttgartip avatinnguaniittoq 28.000-inik inulik malunnaatilimmik susoqarfiusanngikkaluartoq ippassaq alianarluinartumik pisoqarfiuvoq. Atuarfimmi nukappissap aallaasersornera inuit 17-it inuunerannik akeqarpoq. Nukappissap ataatami aallaasaa atuarfimmut nassarsimavaa tassanilu aallaarsarinnilerluni. Siornatigut Ilooqarfinni Erfurtimi Emstedenimilu atuarfinni aallaasersortoqartareerpoq. Tim K-mik taagorneqartup atuarfimmi Albertville Realskolemi iliniartut aqqanillit ilinniartitsisullu pingasut toqoreerlugit qimaanermini aamma allat pingasut toquppai. Kingorna politiit malersuisut aallaasersortoq toquppaat. Kansler Angela Merkel ullumi tusagassiortunik katersuutsitsilluni eqqugaasut misiginneqatigalugit oqaatigaa. – Tupinnaqaaq piffissap taama sivikitsigisup ingerlanerani inuit taama amerlatigisut toqutaammata, ulloq manna Tyslandimut alianartuuvoq, Angela Merkel oqarpoq.

Siornatigut aallaasersortoqartarnerata kingorna inatsisit ima sakkortutigileraluarput, allaat sumiiffiiit ilaanni aallaasit pingussat inerteqqutigineqalerlutik. Taamaakkaluartoq aallaasersortoqaqqippoq. Tim K ataatani aallaasinik katersaqarmat aallaammik tiguseriaannaasimavoq.

Tysklandimi aliasunneqaleruttortoq, Finlandimi naalakkersuisut aallaasit pillugit inatsisiminnik sukateripput. Ilaatigut aallaaniartut peqatigiiffiini ilaasortanngorniaraanni aallaasisiniarlunilu, minnerpaamik 20-nik ukioqartariaqalerluni. Ukiup kingulliup ingerlanerani Finlandimi marloriarluni atuarfinni aallaasersortoqarpoq. Kingullermik siorna septembarip qaammataani.