Atuarfimmi nerisassanik eqqaasarneq unitsinniarpaat

- Ullormut eqqaaviup puussiartai marluk pingasut igiinnartarpagut nerisassaraluanik imallit. Tamatumunnga pissutaagunarpoq nerisassat sassaalliutigineqartut illinnarpallaartarsimanngimmata, Nuummi Atuarfik Samuel Kleinschmidtimi pisortaq Edvard Jensen KNRimut oqarpoq.

Ajornartorsiut tamanna ukioq atuarfiusoq maanna naajartulersoq tamaat atuussimavoq Nuup atuarfiini tallimaasuni nerisassarpassuit eqqarneqartarsimammata. Tamannali maanna qanoq iliuuseqarfiginiarneqalerpoq.

- Ilumoorpoq nerisassarpassuarnik eqqaasoqartarnera tamannalu assut ajuusaarnarpoq, Kommuneqarfik Sermersuumi atuarfeqarnermut pisortaq Hans Peter Broberg KNRimut taama oqarpoq.

- Taamaattoqarneranut pissutaasut ilagaat aallaqqaataaniit politikkikkut piumasaqaataasimammat atuartut tamarmik nerisassanik neqeroorfigineqassasut. Tassa imaappoq meeqqat nerisassanik atuarfimmiit tunineqarnissamik pisariaqartitsinngikkaluartut allaat neqeroorfigineqartarsimasut.

- Kisianni atuartut ilaat atugarissaarpallaanngillat nerisassanik neqeroorfigineqarnissamik pisariaqartitsillutik. Taakku aamma suli neqeroorfigineqartassapput. Maanna atuartut angajoqqaallu immersugassat atorlugit misissuiffigereerpagut nerisassanik neqeroorfigineqarnissamik pisariaqartitsinersut.

- Taamaammat atuarneq augustimi aallarteqqippat nerisassat ikinnerusut suliarineqartalissapput. Aningaasaliissutilli ilanngarneqassanngillat aningaasallu atorneqassapput nerisassat illinnarnerusut suliarisalernissaannut. Suliaq nerisassanik suliarinnittartoq Pilersuisoq suleqatigalugu maanna ingerlavoq, Hans Peter Broberg oqarpoq.

Atuartut aamma ilaqarput immunnik sapigalinnik. Kommuneqarfik Sermersuumit maanna misissorneqarpoq meeqqat immunnik sapigallit sunik allanik neqeroorfigineqarsinnaanersut.

Nuummi atuartut nerisaqartinneqarnerannut 3,5 millioner koruunit ukiumut atorneqartarput.