Atuarfik serlersaarfigitikatappoq: Anitsiartarfik filmiliuserneqartussanngortoq

Igalaamerngit, eqqakkat igalaallu seqummakut.

Tassa tamakkua atuartut, ilinniartitsisut atuarfiullu pedeliisa Ilulissani Atuarfik Mathias Storchip silami aniatsiartarfiani ullaakkut akulikitsumik naammattoortagaat.

- Amerlanerit igalaajupput. Igalaarsuagut ujaqqanik milloorneqartarsimapput. Arsamik aamma aqittaarneqartarsimapput. Taavalu aamma arlaatigut qanoq pineqartarsimaneramik aserorsimasarput, Akitsinnguaq Jensen Larsen, Atuarfik Mathias Storchimi pisortaangallartoq oqaluttuarpoq.

Atuarfik Mathias Storch 2017-mi atoqqaarfissiortinneqarpoq atuarfiusimasup, 2013-milu matuneqartup, toqqaviani.

- Atuarfittaarsuarput nutaavoq. Aatsaat ukiuni marlunni atoreerparput. Taamaattumik ajuusaarnarpoq taama annertutigisumik serlersaarneqartarsimammat. Atuakkanut atugassaraluit allanullu atuartitsissutinut atuarfimmi atugassaraluagut ajoraluartumik aaqqiissutinut atortariaqartaratsigit, Akitsinnguaq Jensen Larsen oqarpoq.

Million affaat angullugit serlersaarinerit akeqartut

Atuarfiummi silami anitsiartarfiani serlersaarisarnerit atuarfimmut maannamut million affaanik naleqarsimapput. Atuarfillu sillimmateqaraluarluni aningaasanik atugassaminik iluarsartuussigallarnernut aningasartuuteqartariaqartarsimavoq.

Taamaammat atuarfimmit maanna aalajangerneqarpoq atuarfiup silami anitsiartarfia filmiliuserneqassasoq.

- Filmiliusernissaa massakkut sulissutigalugu aallartereerparput. Piaartumik filmiliuserneqassapput aamma, Akitsinnguaq Jensen Larsen oqarpoq.

Ilulissani politiit atuarfiup atoqqaartinneqarnerata kingornanit serlersaarinermut nalunaarutit pingasut tigusimavaat. Nalunaarutigineqartulli kikkunnit piliarineqarsimanersut paasineqarnikuunngillat. Atuarfiulli pisortarigallagaata - politiinit ilitsersorneqareerlutik - maanna serlersaarinerit tamarmik nalunaarutigineqartalissasut ilisimatitsissutigivaa.

- Tassa nalunaartussaavugut. Taava aamma filmiuuserpat aamma filmiliutikkut takusimasagut nalunaarutitut uppernarsaatitut atorsinnaallutigit, Akitsinnguaq Jensen Larsen oqarpoq.