Atuarfik nungullarsimaqisoq allanngoraluttualerpoq
Kitaa Arkitekter Sisimiut A/S Rambøll Grønland suleqatigalugu ajugaasuupput illussanik titartaasartunik unammisitsinermi Sisimiuni Minngortuunnguup Atuarfiata iluarsaannissaanut atatillugu.
Minngortuunnguup Atuarfiata iluarsaannissaa 96 millioner koruuninik akeqassaaq aningaasartuutillu Qeqqata kommuneata Namminersorlutillu Oqartussat avissavaat.
Atuarfiup nutaartassaa 5.579 kvadratmeteriusoq naatsorsuutigineqarpoq 2015-imi atualeqqaartitsinermi atoqqaarfissiorumaartoq.
Atuarfik nutarteruni arsaattarfeerartaassaaq aamma timersuutinik allanik ingerlatsiffiusinnaasumik. Taassuma saniatigut atuarfiup iluani inituumik katerittarfeqassaaq.
- Sapaatip akunneri kingulliit marluk pilersaarut assigiinngitsutigut ulapputigineqarpoq, matumani atuarfimmi sulisut, atuarfimmi siulersuisut atuarfiillu nutarterneqarnissaat pillugu ataatsimiititaliaq pilersinneqarnikoq ajugaasussamik toqqaaniarlutik nalilersuisimallutik, taama Qeqqata kommunea nittartakkamini allappoq.