Atuarfik namminersortoq 2009-mi aallartissinnaavoq
Ukiut tallimat qaangiuppata Nuummi atuarfiup namminersortup anitsiarfimmi siarngi isaatitsisut tusaasinnaalissavagut, taama atuarfimmik namminersortumik pilersitsinissamut sulissuteqartut maanna siunniussipput. Taamaattorli Nuuk International Friskolep atoqqaarfissiorneqarnissami tungaanut aningaasarpaalussuit, tassa 80 millioni koruunit suli amigaatigai, taama atuarfissamik pilersitseqataaniartoq Martin Ben Shalmi oqarpoq.
- 80 millioni koruunet katersorniassallugit aningaasarpapilorujussuupput, taamaattumik affaasa aningaasaliiffigineqarnissaat siulliullugu suliarissariaqassavarput, Martin Ben Shalmi oqarpoq.
Atuarfissamik nappaaniarnermi aningassartuutissat 80 millionit affaat aningaasaliisoqarneratigut ukiut pingasut ingerlaneranni pissarsiarisinnaagunikkit, taava 40 millioni koruunit sinneruttut Realkredit aqqutigalugu atorniarsinnaalissagitik, taamaalilluni atuarfiliorneq aallartinneqarsinnaalissasoq oqaatigaa.
Maannakkorpiaq 40 millioni koruuniuteqannginnamik aningaasat fondini ujartoqqaarlugit, iluatsitsilluassagunillu aningaasaateqarfiit sisamat angisuut aningaasaliissuteqarnerisigut aallartissinnaalissallutik Shalmip naatsorsuutiginerarpaa. Taamaattoqassanngippalli fonderpassuarnut qinnuteqartariaqarnissanerarpoq, qinnuteqartarnissamillu iluatsilluarnissaat naatsorsuutiginerarpaa, fondit amerlanersaat ilinniartitaanermut qaffassaaqataarusuttuummata, ingammillu atuarfissaq pingasuinnik oqaaseqarfiusussaq tapersorusussagaat, Martin Ben Shalmi oqarpoq.
Atuarfiliornissamut aningaasarpassuarnik ujarleqqaaratik, ininik atuartitsiviusinnaasunik attartuinnarsinnaannginnersut aperineqarami akivoq, taamaaliorusukkaluarlutik, atuarfiulli namminersortup anguniagaanut naleqquttunik ininik Nuummi nassaarniarneq ajornarnerarpaa, inissaaleqisoqareermat.
Nuuk International Friskolep atulernissaanut aningaasartuutissat ukiut pingasut ingerlaneranni pissarsiarissanngikkunikkit suliaq ingerlannassasoq Martin Ben Shalmip oqaatigaa.
Nuuk International Friskolissami atuartussat 240-nissaat pilersaarutaavoq.
