Atuarfik Mathias Storch ammarnersiorneqartoq
Ukiuni sisamani qilanaarisimasaq kiisami ammarnersiussallugu assut pissanganartoq, Atuarfik Mathias Storchip pisortaata tullia unnersiorpoq.
- Tupinnaqaaq, upperiuminaappoq aamma pissangaqaagut, Atuarfik Mathias Storchip pisortaata tullia, Akitsinnguaq Jensen, oqarpoq.
Ilulissani Atuarfik Mathias Storch 1956-imi atulerneqartoq, nutaanngilimmat oqoqaqimmalu tamaat 2013-imi atorunnaarpoq, aappaaguanilu ingutserneqarluni.
Taartissaalu, atuarfik nutaarluinnaq, silaannarissoq, oqoqanngitsoq innuttaasunit ullaap tungaani qulinulli iserlugu ammarnersiorlugu alakkarneqarsinnaalerpoq.
Qulinut isaareernermi pisussat ilaat Akitsinnguaq Jensenip ima oqaatigai:
- Ilinniartitaanermut naalakkersuisoq aammalu Qaasuitsup Kommuniani borgmesteri ammaanersiornermi peqataassapput atuarfittaarsuarlu ammassallugu. Taassuma kingorna aulatsinni katersuutissuugut, qaaqqusat peqatigalugit, taava tassani oqalugiarnerit assigiinngitsut takutitsinerillu ingerlanneqassapput, atuarfiup pisortaata tullia Akitsinnguaq oqarpoq.