Atuarfik Hans Lyngemi ulloq qinersiffik

Atuarfik Hans Lyngemi Nuummi illoqarfiup immikkoortuani Qinngutsinniittumi atuartut sinniisuisa siulittaasussaanik aqagu pingasunngornermi qinersisoqassaaq.
Allattoq Elisa Isaksen
septembarip 24-at 2013 08:03

 Taama qinersititsinerup qinersinertut sapinngisamik piviusorpalaartumik ingerlanneqartarnera ileqqunngorsimavoq. Ilaatigut siulittaasunngorniarlutik qineqqusaartut videukkut qineqqusaarusiorsimapput.

Ulloq qinersivik demokratiip ulluanik taaguuteqartinneqarpoq, qineqqusaartullu oqallitsinneqassapput atuartunillu apeqqarissaarfigineqassallutik. Tamatuma kingorna atuarfiup timersortarfiani qinersisitsisoqassaaq.

Siorna qinersinermi qinersiartortut 96 procentiupput.

- Atuarfimmut peqqussut naapertorlugu atuartut tamarmik inuinnaat naalakkersueqataaneranni naleqartitanik atuisinnaanngorsimassapput. Atuartullu namminneq qinersinermikkut qinersinertik sunneeqataasoq misigissavaat, aamma demokratiip kiffaanngissusermik pisussaaffeqarnermillu nassataqarnera misigissallugu, Atuarfik Hans Lyngemit tusagassiuutinut nalunaarumminni taama allapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq