Atuarfik Hans Lynge ukiut sisamat matuma siorna atorneqalersoq allilerneqartussanngorpoq
Illoqarfiup ilaani Qinngutsinni inissianik sanaartorneq 2010-miilli sukkasuupilussuarmik ingerlasimavoq, ullumikkullumi suli kranersuit sanaartorfinnittut tassani takussaallutik. Tamannalu pissutigalugu Atuarfik Hans Lyngep 2015-imi allilerneqarnissaanik aalajangiisoqarsimavoq, atuarfiup atoqqaartinneqarneranit ukiut sisamat qaangiutiinnartut. Kingullertigut aamma 1. klassi nutaaq ukiup atuarfiusup aallartinnerani aallartittussaq pilersinneqarsimavoq. Taamaaliortoqarsimanngitsuuppallu klassi ilivitsoq illoqarfimmi atuarfimmut allamut nuunneqartariaqarsimassagaluarpoq.
Atuartut amerliartornerat kommunip tungaanit tupaallaatigineqarpoq, najugaqarfimmimi tassani meeqqat naatsorsuutigisamit amerlanerusut nuussimapput, tamannalu naatsorsuutigineqarsimanngikkaluarpoq. Qaffasissumik ilinniarsimanngikkaluaraanniluunniit naatsorsorneqarsinnaavoq inuit 1000-it illoqarfittaamut nuuppata taakkua pingasorarterutaat meeraassasut atuartussat. Taamatut naatsorsuilaarnikkut aallaqqaataaniillu piareersarluarnikkut kommunip akisoorsuarmik allileraluni sanaartornissaq pinngitsoortissimasinnaagaluarpaa.
Kommuneqarfik Sermersuumi Piorsaanermut ataatsimiititat aalajangerput Namminersorlutik Oqartussat peqquniarlugit Atuarfik Hans Lyngep allilerneqarnissaanut pilersaarutit siuartinneqassasut, sanaartornissap pilersaarusiorneqarnissaa 2014-imi aallartissinnaanngorlugu sanaartornerlu 2015-imi aallartinneqarluni.
Piorsaanermut ataatsimiititap atuartut, angajoqqaat kommunalbestyrelsilu sinnerlugit Nasmminersorlutik Oqartussat qinnuigai piffissaagallartillugu iliuuseqaqqullugit - meeqqallu angajoqqaavisalu angerlarsimaffimmik eqqaani toqqissisimanartumik ernumananngitsumillu atuarsinnaanissaat qulakkeerniarlugu.
